蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年09月19日
馬上成為壹會員

隔牆有耳:土地小組吼荒廢農地? - 李八方

林鄭月娥成立嘅土地供應專家小組成員冇地產商份,原來係避免俾人話官商勾結。

特首林鄭月娥上場後成立土地供應專家小組,檢視土地供應來源,未來會有「大辯論」。睇番搵地方向,唔少人將注意力聚焦開發郊野公園及維港以外填海等,但有地產界高人話小組成員名單內藏玄機,似乎發展荒置農地先係林鄭最想打嘅主意。

真.專家地產商無影

睇返小組成員組成,大型地產商及商會代表欠奉,諷刺係揸住最多地嘅卻係地產商;講到現成「供應」,佢哋先係真.專家!最終影都唔見。
有地產界人士話顯然係悉心安排,皆因若然有地產商在內,任何建議都會被指官商勾結;若一席都冇而最後係由「專家」建議政府收回農地或公私營合作開發農地,咁就可以避過勾結之嫌。
呢位地產界人士話,可以預計搞郊野公園同填海嘅爭議性都極大,就算專家小組建議,政府要推行亦比較困難,反而發展荒置農地,只要冇農耕受影響,推行阻力自然會較少,尤其林鄭絕非煲呔、亦都唔係689,畀人感覺同地產商冇咁親近,落實機會肯定較前兩任特首更高。
至於對地產商嚟講,此舉是好是壞?似乎要睇下政府開出乜嘢價!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載