› 選擇地區
三藩市
紐約
洛杉磯
其他美國地區
香港 台灣 北美
 
2017年09月18日

隔牆有耳:
3.11補選 堅持泛民要初選 
咖喱范企硬唔讓長毛 - 李八方

明年3.11立法會補選有排先到,民主派陣營就上陣人選已火花四起。白鴿黨主席胡志偉早前話過,覺得應畀被DQ議員率先參加補選,點知此說觸動已經明言考慮參加新東補選嘅新民主同盟范國威嘅神經,范仲認為長毛若3.11要去馬,應該同其他有心人喺民主派初選一較高下。
咖喱范同傳媒茶敍時話,胡志偉呢個講法唔係民主動力共識,指民主動力共識係被DQ議員有優先權選番所屬原有議席,若長毛同劉小麗希望參加3.11因青年新政梁頌恆、游蕙禎引發的補選,就要先參加民主派初選。佢希望未來一兩個月內傾掂初選。

話勝訴變擁兩席唔合理

咖喱范仲引用法律意見,話長毛或劉小麗若參加補選並勝出,上訴官司又勝訴,咁就會為民主派帶來另一次爭議,因為一人不能同時擁有兩席,隨時又要再搞多次補選,所以佢覺得民主派同長毛都要審慎深思,下周佢會喺民主動力會議提出,並約長毛傾傾。
問到咁講係咪想為自己參選鋪路?咖喱范話只係講番新同盟喺民主動力講過嘅建議同原則,佢仲話見到民主派有個危機,就係民主派參選人若過唔過到政府確認書呢關,應該用乜嘢Plan B應對呢?但民主動力仲未討論。
對於咖喱范嘅批評,胡志偉同八方講,當日只係講出自己個人睇法,「我諗佢自己諗多咗箒,我冇話呢個係民主派嘅共識」。點解會諗多咗?冇理由唔關磨拳擦掌爭出線事啩!
民主動力召集人趙家賢就話嘞,民主動力共識係被DQ議員喺「所屬選區」有優先參選權,即長毛同劉小麗3.11補選都可優先獲薦參選。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載