› 選擇地區
三藩市
紐約
洛杉磯
其他美國地區
香港 台灣 北美
 
2017年08月22日

旅客送機尾 打工仔遲大到 
市民鬧爆政府:低劣管理

【本報訊】青嶼幹線實施雙向收費第一個工作天導致新界西交通癱瘓,多條主要幹線塞爆,車龍處處,有旅客因此趕不到飛機;亦有上班族被困巴士數小時遲大到,市民鬧爆政府不知所謂,特首林鄭月娥稱民生無小事,自詡班子是「專業團隊」卻淪為笑柄,「低劣政府管理就係咁!」有市民要求暫緩青嶼幹線實施雙向收費,「唔好再搞啦,咁麻煩!」
記者:黃麗英

相關新聞:收費亭分階段施工欠諮詢

青嶼幹線於上班繁忙時間塞爆逾3小時,市民怨聲載道,趕赴機場搭飛機的旅客最狼狽,不少人身水身汗趕到機場,但飛機已起飛,換來一肚氣。其中黎先生表示,他昨晨10時許,乘搭A22巴士往機場,準備赴上海參與義工活動,但由於塞車兩小時,到機場時已趕不及上機,「塞得好犀利,架車好慢好慢!」

屯門往迪士尼耗兩小時

黎先生無奈多花約1,400元購買一張新機票,要至今日凌晨才能抵達當地,他批評今次塞車元凶是青嶼幹線實施雙向收費,政府應變措施不足,「世界好多地方已經有單向收費,唔明政府點解行返轉頭?」他表示,前往機場的道路是本港主要幹道,一旦決定落實新措施,應該有措施及時疏導交通,今次引致大塞車,相信連累不少人蒙受損失。
市民張先生表示,昨晨8時半在屯門碼頭上巴士往荃灣,平日車程大約45分鐘,但他昨日9時40分仍塞在車龍中,「仲未到麗城」,他歸咎青嶼幹線實施雙向收費,無法疏導車輛,波及屯門公路。他認為實施電子道路收費才可有效解決問題。
家住屯門的方先生在迪士尼上班,他指平日坐機場巴士再轉車,車程約45分鐘,昨卻耗兩小時才到迪士尼,他昨早於7時40分在屯門上巴士,其後經過屯門公路轉車站及汀九橋時都非常擠塞,「喺汀九橋停晒咁滯」。他指出只有兩條自動收費通道和5條人手收費通道很不足夠,「中間幾條行車線封晒,收費亭未ready,就唔好實施住啦,即係逼人坐地鐵」。
有市民質疑「以後入機場唔知點預時間」,有人認為「以後搭飛機只能坐機鐵」,另有人更笑稱:「早一晚去機場!」有市民批評青嶼幹線收費亭開得太少,加上找續需時,導致車輛越積越多。

相關新聞:運輸署長懸空兩月無人選

不屬旅遊保險賠償範圍

運輸署發言人表示,會檢討今次事件,探討日後如何改善,又認為塞車可能與往機場方向改為須付橋費有關。
國際專業保險諮詢協會會長羅少雄表示,一般旅遊保險不保障因塞車而趕不到飛機的損失,因為保險公司將趕不到飛機歸類於個人問題,除非是航班取消及延誤,乘客才能獲得賠償。就今次事件,市民指摘是政府實施雙向收費卻低估交通擠塞問題,在事件中有所損失人士,可以循民事向政府索償。

打工仔及旅客心聲

譚小姐:
「塞車搞到返工遲咗個幾鐘……呢個收費做法,令去機場同國泰城返工嘅同事造成不便。」

邵女士:
「平時一早都返咗工,陰功!一路行、一路停,喺大欖隧道停咗幾耐吖,命都冇!」

黎先生:
「搭車搭咗兩個幾鐘,大失預算,趕唔切上機,要畀1,400蚊臨時買另一張機票去上海。」

識睇睇留言

Boey Kwong:我喺汀九塞20分鐘都未上到青馬
Dell Li:開咗學唔敢諗乜情況。究竟嗰啲路政署運輸署諗乜嘢?
Gary Law:乜都話起,無諗過實際需要同影響
Chris Cheung:問責官員快啲出嚟問責受靶
Man Yiu Chan:𠵱家政府究竟有幾多人做緊嘢?而唔係擦緊鞋?
Daniel Chung:明知要收費都唔做埋八達通同請返多啲人

資料來源:《蘋果》facebook

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載