蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年08月13日

談大腿十架「最痛係釘同拔嗰吓」

20,933
■林子健前日向傳媒展示大腿上堆叠成多個十字架的書釘傷勢。

【本報訊】民主黨成員林子健懷疑遭內地強力部門人員禁錮並施以酷刑,他昨接受《蘋果》專訪時,披露更多被擄走前的細節。林指事發當日到油麻地一間球衣店購物前,曾到信和中心斜對面附近的快餐店借廁所,其間一直未有異樣,最終才於砵蘭街及咸美頓街一帶被擄走。
林子健前日召開記者會展示大腿上的「十字架」,畫面觸目驚心。但外界有人質疑他冒着細菌感染風險,仍忍痛召開記者會的動機。林昨坦言,「我夠膽話畀你聽,釘咗落去已經冇咁痛」。他憶述最痛楚的時刻,「最痛係釘入去同拔嗰吓,反而釘咗入去,入咗去唔係好痛」。

稱被雨淋醒後無遺失物品

另一爭議是他在沙灘蘇醒後仍能冷靜地乘的士回家。他解釋,在沙灘被雨水淋醒後,發現隨身物品包括手提電話仍完好無缺,「佢(擄人者)又好好心,個袋(背包)又畀返我,電話放返係褲袋……醒返啲衫又着返晒」。
對於有網民質疑他回家後將事發時身上的衣物全部清洗,等同毀滅證據,他自言也未能解釋有關行為,「我返到屋企攤咗係梳化,(身上衣物)臭吖嘛,(老婆)佢又叫我洗咪洗。你問我我唔會有意識話要留返啲咩,有啲人就話你隻腳咁痛仲沖涼,我覺得好臭又污糟要沖涼囉」。
對於內地強力部門禁錮他後就將其放走,他說:「佢都放咗林榮基啦,有啲有事、有啲冇事,邊有千篇一律?」
■記者譚靜雯

蘋果日報fb,每日分享精選新聞及網絡新鮮事。
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載