› 選擇地區
三藩市
紐約
洛杉磯
其他美國地區
香港 台灣 北美
 
2017年08月10日

隔牆有耳:袋巾約戰MEI FUN & FRIENDS
邀公開辯論一地兩檢 - 李八方

真理,當然越辯越明!日前立法會5位有法律背景嘅議員成立「法律界一地兩檢關注聯席」,發起人之一嘅經民聯梁美芬豪言壯語,話為免民主派將歪理講100次講到變成真理,佢哋都要講番100次、200次、甚至300次。可能因為咁,公民黨主席梁家傑就向鼠王芬下戰書,邀請公開辯論高鐵一地兩檢,希望以真理煞停呢班列車,結果係點?
袋巾發出新聞稿,話得悉多位建制派法律界人士成立咗聯席,又話一地兩檢方案完全符合《基本法》、促進一國兩制,之但係包括佢在內都有唔少法律界人士覺得方案係回歸以來,最嚴重破壞《基本法》嘅事,同時對一國兩制造成空前衝擊,所以邀請鼠王芬公開辯論,等市民對方案嘅法律問題有更全面、深入、仔細嘅了解。

相關新聞:死撐高鐵48分鐘到廣州政府仲吹唔夠?

鼠王芬:平常心接招

傑哥磨拳擦掌、蓄勢待發,鼠王芬則稱平常心,暫時未能同佢過兩招。八方問過佢,佢話好樂意同傑哥傾㗎,即使佢唔希望為辯論而辯論,都絕對會以平常心去接招、同傑哥討論,但佢一早計劃咗今日起程去美國,到月底先返港,所以傑哥怕且要等下個月先可以出擊嘞!
八方都睇過,鼠王芬確實一早預咗要去美國,早前都有傳媒報道過,佢此行一為探仔、二為出席學術交流,題目咁啱係同一國兩制有關。八方建議鼠王芬,不如搵何君堯等其他聯席成員應戰,但鼠王芬話,佢都想趁機講多啲《基本法》嘅立法原意、《基本法》精神等,所以有勞傑哥稍候喎。袋巾就話鼠王芬唔得閒唔緊要,只要聯席成員如何君堯、馬恩國肯嚟都得,日期、時間、地點統統有得傾。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載