› 選擇地區
三藩市
紐約
洛杉磯
其他美國地區
香港 台灣 北美
 
2017年07月25日

隔牆有耳:楊潤雄睇愛情小說紓壓 - 李八方

書展倒數前夕,財經事務及庫務局局長劉怡翔同教育局局長楊潤雄先後捧場,同青年傾偈之餘,又分享讀書心得,其中楊潤雄話佢睇嘅書籍種類「好雜」,無論小說,抑或特首林鄭鍾意嘅愛情小說,佢都有睇,而且中文或英文書,佢都一概唔拘,並指閱讀係佢紓緩壓力嘅方法之一,但𠵱家就「睇得慢、睇少咗」。
其實講到讀書,不得不談自稱月睇30本雜誌同小說嘅前教育局局長吳克儉,楊潤雄噚日被問到係咪都會月睇30本書時即時大笑,賣關子叫記者估下喎,答案好明顯啦!而佢噚日一次過買咗3本書,行過樂文書店嗰陣,仲對之前好Hit嘅《你的名字》特別有興趣,話「好得意」轉頭返嚟買,但最後尾冇返轉頭,唔知有冇託人買番?
而青協攤位有個靚女店員噚日一見到劉怡翔,就力Sell講一帶一路背包客嘅《背包行》,唔通係想對方親身「實踐」一帶一路?劉怡翔話鍾意旅遊影相,平日多數睇呢兩類書,同時向青年推介《智能時代》,話社會過份依賴科技,好多工作都被電腦代替,所以要凸顯創造力嘅重要性。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載