› 選擇地區
三藩市
紐約
洛杉磯
其他美國地區
香港 台灣 北美
 
2017年07月21日

隔牆有耳:小肥張72變 公廁換衫走7場
試過cosplay裝修工去上堂 - 李八方

曾稱「打呔返工就興奮」嘅政務司司長張建宗同傳媒茶敍,呢個工作狂自爆平日清晨5點半起身睇報紙,朝早約7點半返到office,晚上8點先返屋企,但返到屋企仲會再工作兩粒鐘,主要係回覆電郵,就連星期六佢都會返office辦公,話以往做勞福局局長時試過一日出席7個活動,行程緊密,其間要到公廁換衫出席另一活動,「試過朝早着波鞋,夜晚着tuxedo」。

相關新聞:隔牆有耳:暗寸689:維港魚都唔多條

膚色太白被識穿

七一宣誓時因為普通話發音唔太準確成為熱話,張建宗承認「知道自己不足,我係要努力」,𠵱家有跟老師上普通話課,指過去嘅崗位,完全冇機會練習普通話。雖然榮升政務司司長,但佢仲未搬入官邸,透露官邸只會做一啲必要維修例如更換冷氣系統,唔會裝修、美化,相信工程需時兩個月,完成後先遷入,笑稱連官邸嘅網球場喺邊都唔知,佢亦會請政治助理搞facebook同大家connect。
人稱「樓王」嘅佢話物業都係太太名下,同自己冇太多關係,自己只係幫手交稅箒。講到當年推出「平安卡」時曾經喬裝裝修工人接受平安卡課程訓練,佢話取卡後只係續期一次,「因為唔想再煩啲同事」,而當年喺「平安卡」考試答中晒20條問題,試過同8位食煙工人一齊午膳,其白皙皮膚令人留意佢唔係建築工人,及後先發現佢係勞工處處長。
至於聘用副局長同政治助理問題會唔會考慮中聯辦引薦或要求,張建宗只話要經適當程序,「唔係有個名就照收」,相信10月時副局同政助會「齊人」迎接新一屆立法會會期。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載