› 選擇地區
三藩市
紐約
洛杉磯
其他美國地區
香港 台灣 北美
 
2017年07月01日

各界2047年預言

柯小姐(大學生)

「(30年後香港)應該會好亂,好多大陸人……都擔心(全街講普通話),其實𠵱家成條街嘅人都係講緊普通話,呢個現象已經越嚟越普遍……如果你話講普通話都仲可以,但變成簡體字就冇道理囉,因為用開繁體字就應該堅持用返,唔應該話要遷就佢哋。」

相關新聞:市民如何展望2047年

雷先生(學生)

「其實都係變咗做中國嘅啫,一國一制囉,2047年後唔會有真普選,六四集會都可能被禁止,𠵱家中共不斷染紅香港,令到香港好多人權、自由都冇,呢個情況由回歸開始已經有。即使喺極權下傳媒都有生存空間,《蘋果》消唔消失就睇營銷手段同報道手法。」

李小姐(私人助理)

「30年後樓價繼續升,相信好多香港人都死晒啦喎,同埋應該移民咗去第二度地方,冇可能咁樣升㗎喎,但係始終中國政府做咗好多嘢令香港中國化,相信喺呢個情況下樓價飆升係好正常,到時亦有好多人生存唔到囉。」

相關新聞:2047年香港會變成點?

梁先生(工程業)

「你睇得出不斷有講普通話或內地精英落嚟香港,就算2047嘅時候都係呢班人護住香港、統治香港,獨立嗰啲都唔會發生……最怕內地精英到時控制香港所有中產階級,呢個先最重要,到時香港咪變咗中國一個城市,呢個係必然㗎囉。」

黃小姐(社工)

「對2047年有真普選冇太大希望,因見到林鄭上場後,可能好快23條立法,可能我哋行出嚟之後會受到打壓,覺得香港越嚟越大陸化,所以唔敢講2047會發生乜事,我覺得所謂嘅普選係有嘅,但所謂一人一票就係中共內定兩個,唔係香港人想要嘅真普選。」

羅先生(廣告業)

「2047年?唔好話30年啦,3年都唔敢講,唔夠膽想像,到時23條應該立咗法,係睇形式上有冇少少轉彎(空間),我諗言論自由嘅範圍會縮細好多,同大陸𠵱家嘅城市冇分別……以後睇新聞都係睇網上㗎啦,唔會有一份印刷嘅喺街度賣。」

戴耀廷(港大法律系副教授)

「啲人諗2047年,其實係假設中共仲喺度,我覺得呢個係好大嘅問號。如果中共以𠵱家嘅形式繼續管治落去,未來十幾年中國已經要面對好大變化。不如諗咗點樣面對中國好大嘅轉變先啦。所以我唔覺得我哋需要諗到2047,呢個問題問得太早。」

陳健民(中大社會學系副教授)

「呢件事在乎中國。中國嚟緊十年八年都面對幾大轉變,就係習近平用𠵱家嘅方法反腐成唔成功,之後會點?係走向更專政抑或自由化?我諗呢幾年要睇咗中國變成點,睇吓佢對香港會點。如果按𠵱家呢種政策落去,唔使到2047年,香港都一國一制。」

田北俊(自由黨榮譽主席)

「我覺得到2047,可能香港人唔咁緊張一國兩制,因可能中國十大城市已同香港生活水準冇分別……佢哋好過我哋嘅話仲有乜好驚?當經濟發展得好,資訊一定流通,市民一定唔做順民,唔做順民唔一定反政府,你有腦會諗,發表意見,已代表自由、民主。」

梁國雄(立法會議員)

「如果你話2047香港可能變做一國一制,咁共產黨就冇需要2047前行一國兩制,就算佢講係一國兩制,其實都係一國一制。如果我哋𠵱家維持唔到(一國兩制),話要確保2047維持到係嘥時間。若港獨、自決只限於你係咪信守97年嗰個制度,係冇意思。」

謝偉俊(立法會議員)

「再過多30年,香港唔會再搵得番以前嗰種地位。如果想香港繼續做國際城市,中英水平、禮儀、文化好好,呢個唔會再發生,因香港唔再係殖民地,將會係一個華人味道重嘅地方,價值觀唔會好似97前咁,好多嘢都已唔同咗,香港係變緊做一個內地省市。」

李卓人(工黨副主席)

「中國若繼續專制獨裁,就要睇香港仲有冇利用價值,如果有,北京可能仲想香港不變,但都無癮啦,我哋係想向前、命運自主。我某程度係樂觀,因香港有個公民社會、自主意識強,中共唔係咁易食咗我哋,但我哋守得住香港,係咪攞到民主?我唔敢樂觀。」

97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載