› 選擇地區
三藩市
紐約
洛杉磯
其他美國地區
香港 台灣 北美
 
2017年06月28日

隔牆有耳:傳落區視察有政治含意
習大大遊西九 撐奶媽 - 李八方

升呢做國家主席後,習近平聽日首度來港,除咗出席回歸20周年活動同主持宣誓儀式,仲會落區視察不同基建,據知佢呢次「觀光」行程,全部都好有政治意思,尤其抵埗後將踏足西九文化區,藉住西九係林鄭專責主理嘅baby,凸顯對候任特首奶媽林鄭月娥嘅高度支持。
有知情人士話,喺西九拍板落實建故宮館前保密嘅要求,都係中方提出,最後特區政府搵到馬會贊助,以免要經正常程序攞撥款,拉布都拉到項目夭折。其實咁樣未經諮詢嘅安排,林鄭又點會唔聞到火藥味?但佢獨力承擔,仲話過如果要諮詢而遇反對,中央會非常尷尬。
呢句話聽在港人耳裏一把火,中央卻還得神落,據知阿爺覺得冇揀錯人而好安樂。而呢種有擔當,正正係阿爺搵佢臨危受命代替梁振英上場選特首嘅原因,而林鄭就算私下未必支持梁振英施政,但至少唔會公開唱反調,據聞呢點同曾俊華嘅分別,就係阿爺揀佢嘅關鍵,所以此行第一擊就送咗畀林鄭。
據聞習大大會視乎情況,順道去埋西九嘅高鐵站,旨在話畀市民聽中央支持此項目,尤其一地兩檢方案料7月出爐,係林鄭首個要推嘅大爭議項目,同樣都係為林鄭打氣嘅啫。

臨走前去睇港珠澳橋

至於臨走前盛傳會視察嘅港珠澳大橋,就真係唔睇唔得咯,2011年動工,歷經波折終於喺年底完工,通車在望,算係梁振英任內嘅政績,習大大又豈可不親臨支持?唔好忘記,條橋跨越粵、港、澳三地,可算中央嘅整體大project!雖則習大大揀呢三大景點,旨在傳送政治訊息,但唔好忘記呢3個地方,各有「污點」。西九文化區嘅內涵軟件一直惹爭議,同高鐵工程都嚴重超支,港澳珠大橋仲爆出造假醜聞,查實習大大會唔會係明查暗訪,睇吓香港到底出現咗乜問題?

李八方

97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載