› 選擇地區
三藩市
紐約
洛杉磯
其他美國地區
香港 台灣 北美
 
2017年06月27日

八方相當年:讀中學叫校長收皮 讀大學監察校政
毒男區諾軒 自細抗爭 - 李八方

踏入第15年的7.1民陣大遊行本周六起行,今年民陣召集人由民主黨南區區議會票王區諾軒「揸旗」,同港足教練金判坤勁似樣嘅區諾軒自細已經多才多藝,年少時吹笛、打鼓娛賓,大學時唔跟潮流去美、加、澳交流,自稱有少少「毒」嘅佢單拖去日本練得一口流利日語,家吓開班授徒教日文,原來由細到大都係抗爭型。
1987年出生嘅區諾軒年少時就讀聖若瑟英文中學時參選競逐學生會做副會長,拉橫幅叫同學寫上對學校嘅意見,結果個個同學留言,由佢將下情上達。佢當年不滿中學校長成日搞面子工程,到校長室門外大喊「校長收皮」。反叛學生成績一定差?當年佢高考中化攞A,入埋中大政治及行政學系。
上到大學碰上中大史上最不受歡迎校長之一嘅劉遵義,除咗將中大畢業禮變示威場地,仲同其他同學成立「劉遵義施政監察」。在學時佢擔任中大學生會內務秘書,專責監察校政,沈祖堯準備接棒上場時,佢帶咗個「劉遵義離任倒數鐘」要求對方揭幕。當年中大校巴計劃要收費,佢喺學生會印製假嘅3蚊車資車票,畀同學塞滿校巴錢箱以示不滿。

細個志願做DJ

佢自爆細個填寫「我的志願」係電台節目主持人,仲會厚住面皮上電台玩遊戲。入到中大主持中大校園電台,做外務副台長,算唔算圓夢?
自細抗爭史一大籮,唔少父母未必鍾意,佢話大學時父母知道佢喺大學校內衝擊都唔多like,叫佢唔好咁激。但為公義、民主同小市民發聲,從來都係一點一滴,用時間做證,佢2011年當選區議員,2015年做埋南區區議會票王,父母選舉時都幫佢助選,佢仲呼籲大家7.1一齊抗爭。

李八方

97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載