› 選擇地區
三藩市
紐約
洛杉磯
其他美國地區
香港 台灣 北美
 
2017年06月14日

隔牆有耳:吳得掂150日環遊世界
外訪54次使316萬 飛行里數21萬 - 李八方

讀萬卷書不如行萬里路?聲言月讀30本書嘅教育局局長吳克儉,5年任期以飛機代替雙腿「自我增值」,八方綜合佢54次外訪行程,發現腳毛遍及美加英德澳紐秘魯韓國新加坡,逾300萬外訪開支換來21.6萬飛行里數,離港日數逾150天,月薪30萬嘅佢儼如「旅遊局長」。立法會教育事務委員會主席林大輝話呀,辦教育係用政績唔係用里數,對吳卸任在即頓覺解脫,「壓喺心口塊石頭就快拎走,噩夢就快完結」。

臨別仍開拓越緬新大陸

掌握莘莘學子前途嘅吳得掂,任內非以教育見解聞名,而以外訪次數多見稱。綜合5年外訪逾54次,倒數在即外訪次數卻越多喎,預告離開熱廚房嘅佢今年已出訪17次。細數遊歷足迹,遍及世界各地:英、美、加、澳、比利時、芬蘭、德國、瑞士、秘魯都去過,告別之年未停步,更開拓泰國越南緬甸等新旅程。惟「食放題好正」、「睇星好靚」、「雜誌好刺激」嘅日本則不在外訪名單,因2015年缺席立法會TSA公聽會係外遊非外訪,雖然佢曾將外訪當放假,可見兩者一線之差。
林大輝話呀,吳得掂似乎唔知教育局長本業係乜;其實早喺2012年底已有議員提出要求吳下台嘅動議,大輝當時唔支持炒佢,「當時佢剛上任,或者唔熟悉處理政府運作,雖然有重大錯誤(國教風波),都希望佢糾正,重新做好工作,(但)辜負建制派對佢嘅寬恕同心血。」
64歲明言退休嘅吳得掂曾為自己平反,憤指部份人士對佢嘅負評係「人格謀殺」,大輝直言委任吳嘅梁振英都要為此負責,因為任期中段既然換過局長(曾德成及鄧國威),點解由得吳得掂繼續做?八方叫大輝列舉吳任內一項政績,佢面有難色:「呢個難㗎,真係難㗎,如果叫我搵佢5年來一樣工作嚟讚佢、認同佢,唔容易㗎……就算有,相信都係我夾硬講出嚟」。但佢好學月讀30本書同雜誌增值喎?大輝都「讚嘆」對方嘅閱讀能力同速度,「咁希望佢離任後將呢項『絕技』教大家啦」。

李八方

97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載