› 選擇地區
三藩市
紐約
洛杉磯
其他美國地區
香港 台灣 北美
 
2017年06月07日

隔牆有耳:「失蹤人口」再現
《警訊》Leo Sir脹卜卜 六四出更 - 李八方

跳出電視框9年嘅Leo Sir(中)六四出動執勤,肥咗又穩重咗。王子俊攝

早幾日六四晚會,唔知大家有冇喺之後隨多個團體遊行到中聯辦?如果有,或者會覺得現場一個男警員相當面善,好似喺邊度見過咁,但又未必即時諗起佢係邊個?查實認唔出都唔出奇,皆因呢位阿Sir相對大家認識佢之時肥咗,到底係邊個?咪就係《警訊》前靚仔主持盧宜頌Leo Sir。

同遊行人士交涉

《警訊》呢個長壽節目,雖然主旨係重演案件過程,提醒市民小心防範,近年因為唔少娛樂元素甚至惡搞「抽水」,惹嚟熱議,但最令人印像深刻或者都係歷年由警察兼任嘅主持,精挑細選下代表警隊出鏡嘅人喎,質素梗係有番咁上下,其中人稱Leo Sir,當時係高級督察、現為總督察嘅盧宜頌係近年最長壽主持之一,2003年至2008年都同大家見面,憑住醒神大眼靚仔樣,吸引唔少粉絲,當年佢卸任交棒退居幕後時,網民都話唔捨得㗎!
估唔到近期Leo Sir重現人前,繼續吸引唔少人注意。佢六四當晚以西區警區警民關係主任身份,同遊行至中聯辦外嘅人士交涉,其間攞咪介紹自己後,溫馨提示請願人士為免阻塞其他道路使用者,可以行番去行人路,闊別公仔箱9年嘅佢,塊面同身形都圓潤咗,但表現依舊斯文淡定,相對以前年輕時嘅活力,家陣就多咗份穩重。
原來喺2015年2月,Leo Sir獲特首梁振英頒發「長期服務獎章」,當時佢兼任少年警訊領袖團步操顧問;今年1月,佢仲以警務處訓練及職員關係主任(西區)職銜,列席南區區議會會議,唔知《警訊》會唔會製作懷舊特輯,搵Leo Sir出山再做主持?

李八方

97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載