› 選擇地區
三藩市
紐約
洛杉磯
其他美國地區
香港 台灣 北美
 
2017年05月23日

隔牆有耳:傳三司原班過渡
林鄭抹唔甩陣CY味 - 李八方

新人事、新作風,但如果政府官員全部係舊面孔,試問點會有新猷?當選特首後三番四次話要有管治新風格嘅林鄭月娥,喺組班方面遇上困難,喺無人肯入熱廚房嘅情況下,政圈流傳梁班子嘅3位司長會原班過渡至新政府,有關消息震撼政界,一來說好了的管治新風,完全唔見,二嚟連「梁粉」陳茂波都有得留任,網民質疑689可以轉做太上皇喺幕後垂簾聽政,777名副其實係「CY 2.0」嘞啩!
政圈一直流傳林鄭屬意三司以新面孔登場,但多番遭心儀人選請食檸檬後,退而求其次,或以現有三司原裝過渡。有傳媒噚日引述消息話,林鄭已向北京推薦三司人選,喺公務員事務局局長張雲正拒升呢後,非林鄭首選嘅張建宗會留任政務司司長。
財政司司長方面,雖然林鄭欲換人,坊間傳出嘅財爺人選亦眾多,包括近期熱傳嘅嶺大校董會主席歐陽伯權,但最終都係由梁振英「愛將」陳茂波跑出,有機會續喺耗費裝修嘅財爺官邸再住5年。
隨住律政司司長袁國強表明七一唔再留喺熱廚房,而鄭若驊等心儀之選對此職耍手擰頭,人選難覓下,報道指林鄭推薦律師會會長蘇紹聰接任,而袁國強答允留任一段日子,以便處理棘手嘅一地兩檢問題。
八方問過候任特首辦,現屆三司係咪原班過渡?發言人回覆話,候任行政長官現正密切進行籌組下屆政府問責團隊嘅工作,不宜透露詳情,亦唔會就傳聞回應。

相關新聞:隔牆有耳:波叔豪裝官邸未卜先知?

泛民斥「一路向西」

若然三司冧莊消息真確,嘩,林鄭月娥以後咪話自己唔係「CY 2.0」咯!民主黨立法會議員許智峯都係咁話:「如果係真,林鄭嘅『CY 2.0』形象係抹唔甩;最高嗰兩三個位你都換唔到人,仲要有個『梁粉』陳茂波留任,就算你局長嗰邊換到班又點?喺啲高層次決策,都只會係延續梁振英嘅路線。」
許智峯話呀,雖然林鄭同CY嘅個人風格始終有別,但對林鄭所謂嘅管治新風,向來無甚特別期望,「始終小圈子選舉出嚟嘅特首,只係會一路向西」。
公民黨楊岳橋亦話喎,林鄭話過希望上任後可以帶嚟新氣象,但佢卻要負資產陳茂波同袁國強留任,令人質疑佢喺人事佈局方面,有幾大自主權。佢尤其擔心,將梁振英嘅親信陳茂波放喺林鄭身邊,新政府係咪真係有足夠空間去管治?「陳茂波過渡,係擺脫唔到林鄭係『CY 2.0』嘅影子」。

識睇睇留言

Kc Lo:真係半個叻人都搵唔到?消息確實嘅話,說明777全面扯白旗,肯定要做鵪鶉,嚟緊日子有排受!
Fu Yu Tau:777你上到位,梗係要聽皇上同皇上皇擺佈啦。你以為真係靠自己呀,假天真!
Cammy Chan:負資產都要?
Wallace Chiu:689轉做太上皇在幕後垂簾聽政,淋病呢個兒皇帝有權有膽郁太上皇啲愛將嗎?
Wong Fu:一早批死係CY.2.0,未選特首已鬼話連篇、醜態百出,選舉後再使用語言藝術呃大眾改過,睇怕香港再辛苦多五年!
Yulia Yulia:中國政府真冇眼光,雙手捧起嘅林鄭連個領導班子都搞唔掂,試問點樣帶領香港啊?!game over
Loklong Sy:難道是有才能的人覺得無官一身輕?還是香港根本就沒有做官的人才。
資料來源:《蘋果》網頁

李八方

相關新聞:隔牆有耳:蘇紹聰爆冷接袁國強棒?

97年主權移交至今,香港前進還是倒退?「蘋果」與你細數廿載風雨。
【回歸二十年】專頁: http://hksar20.appledaily.com.hk

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載