› 選擇地區
三藩市
紐約
洛杉磯
其他美國地區
香港 台灣 北美
 
2017年05月11日

隔牆有耳:容海恩真名打「皇室戰爭」
做埋港男港女聯盟副首領 - 李八方

喺立法會講到打機呢樣嘢,相信大家第一個諗起嘅,怕且係有「電競聰」之稱嘅香港眾志羅冠聰。但其實一眾議員之中,都有唔少人鍾意打機,較令人意想不到嘅係身為大狀嘅新民黨容海恩Eunice,原來都係機迷。
唔講你唔知,講咗你亦未必信,Eunice有玩非常出名嘅手遊Clash Royale(部落衝突:皇室戰爭),仲要實名打機,唔怕露真身㖭。

計啱時間「開寶箱」

八方噚日喺立法會會議廳外見到Eunice,閒聊之際,佢突然拎咗部電話出嚟,望一望個鐘,跟住有所行動,然後就撳撳撳。正當八方納悶,無啦啦仲乜咁緊張玩電話,Eunice二話不說就開咗個遊戲,然後非常熟練咁開咗一個寶箱,果然係一位資深玩家。
玩開手遊嘅朋友都知,手遊絕對係一個課金嘅無底深潭。之不過呢,Eunice似乎看破咗紅塵,佢話知道課金呢啲嘢係返唔到轉頭,所以堅決唔課金,加上佢話呀,打手遊只係旨在打發時間,毋須太上心!
八方叫佢開個game嚟睇吓,一睇之下,赫然見到「容海恩」3個大字,原來Eunice打手遊都係用真名,而且佢入咗嘅隊叫做「港男港女聯盟」,仲做埋副首領㖭,唔知其他網民知唔知呢位「容海恩」,真係立法會議員之一嘅容海恩呢?唔知葉劉又係咪Eunice隊友呢?

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載