› 選擇地區
三藩市
紐約
洛杉磯
其他美國地區
香港 台灣 北美
 
2017年05月09日

隔牆有耳:「哈哈笑多到上個鼻」撐曾志豪
薯片叔出山唱三簧 - 李八方

陳嘉銘(左)同曾志豪(右)請咗薯片叔出山拍「廣告」。
回帶廿年棟篤笑fb截圖

曾志豪同陳嘉銘趁回歸廿周年炮製「回帶廿年棟篤笑」,嚟緊周六、日喺新光戲院大劇場上演。趁曾俊華仲有叫座力,兩人搵嚟薯片叔喺佢母校喇沙書院拍片宣傳。薯片叔仲以一身劍擊服亮相,同二人唱「三」簧,唔只二創競選金句,仲笑言:「睇多啲新聞,會有好多諗都諗唔到嘅笑話㗎」,唔通係暗寸林鄭笑話無限?

相關新聞:隔牆有耳:捧莫華倫場 奶媽變粉絲

叫睇多啲新聞搵笑話

片中薯片叔用番自己競選辦嘅短片模式,先以iPad遮面介紹自己:「我係曾俊華,與其相信一個人,不如相信兩個人。」佢話兩個人嘅棟篤笑好似劍擊咁,如果篤中對方要害,啲「哈哈笑」會多到上個鼻嗰度,呢句分明係抄佢當日寸林鄭「嬲嬲多到上個鼻度」嘅金句。
佢仲提醒曾志豪,想度稿要睇多啲新聞,會有好多意想不到嘅笑話,又指:「剃鬚就唔會嘞,睇show呢我就一定會嚟,我個有錢都買唔到嘅公關團隊都買唔到你哋啲飛喎?」嘩,真係瞓身hardsell!棟篤笑門票分200蚊、400蚊兩種,薯片叔仲會做其中一場觀眾,唔知大家有冇緣遇上薯片叔呢?

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載