› 選擇地區
三藩市
紐約
洛杉磯
其他美國地區
香港 台灣 北美
 
2017年04月15日

隔牆有耳:
黃毓民告別政壇去教書 
fb暗寸國師皇上玩清黨 - 李八方

自從青年新政梁頌恆、游蕙禎立法會議員資格被DQ、熱普城喺立法會選舉後又內鬥不停,包括熱血主席鄭松泰在內激進派人士又被人拉,好多黃毓民支持者,都想教主出返嚟主持大局,最好參加埋立會補選。不過教主喺呢個關鍵時刻突然喺facebook出咗篇長文,宣佈不再從政、全面退出政壇,唔再參加、組織政治團體,亦唔會再參選。

籲年輕人冷靜勿盲動

黃毓民教主寫呢篇叫「為人辯冤白謗 第一天理──致為公義而受逼迫的香港青年公開信」,教主話去年立會選舉後,曾想將一啲感想寫低,除咗坦承失敗,亦認為要向支持者交代未來去向,而佢咁大篇文,當然一大半係鬧民主派、大中華膠、梁振英等等,但亦不忘鬧一班「嶄然見頭角」嘅年輕人,「或者賣乖取巧,或者行險以僥倖」,話佢哋政治上稍有憑藉,就「志得意滿,則很快便變得面目模糊」。
教主亦唔開名鬧埋選後大搞清黨嘅國師陳雲,同埋係咁喺fb block教主支持者嘅皇上黃洋達,指有人玩清黨「愈玩愈興奮,矛頭甚至指向MyRadio及我身邊的人」,令佢非常遺憾、又話有人連佢秘書喺fb上載同某啲人吃喝玩樂相,「竟然也不容於某位『敵我分明』的『面書』朋友」而被block,直言有人搞清算要寧枉毋縱,鬧呢啲人因為私怨、朋黨冇晒理性,「這樣的人還可以相信嗎?」
雖然好多教徒想教主再出嚟主持大局,但教主就話要向政治講再見,話唔應該阻擋年輕人前路,所以決定退出政壇,唔參加或組織政治團體、唔參加選舉,回歸返去文化傳訊同教學崗位,但唔等同佢唔再過問政治,又呼籲年輕人必須冷靜沉着、唔好盲動同作無謂犧牲,話時間係喺年輕人呢一邊!

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載