› 選擇地區
三藩市
紐約
洛杉磯
其他美國地區
香港 台灣 北美
 
2017年04月07日

隔牆有耳:
肥仔聰話奶媽冇搵佢入局 - 李八方

卿姐鬧羅永聰講嘢唔用腦。朱家駿攝

因為幫曾俊華助選、獲林鄭賞識嘅財政司司長前政治助理羅永聰人氣急升,民主黨劉慧卿噚日都趁機喺網台節目《議會內外》訪問佢。阿聰同卿姐講,因為林鄭喺選舉論壇咁讚一讚,搞到佢𠵱家出街都多咗人識,最開心係有次同太太落街食消夜,隔籬枱一對夫婦搶住幫佢埋單,所以衷心多謝奶媽欣賞,令佢有人識,不過奶媽至今未搵佢,佢亦唔想自抬身價。

籲同市民建信任關係

卿姐指有建制派認為林鄭應搵阿聰做新聞統籌專員,但阿聰話林鄭同薯片叔做事作風唔同,唔敢話自己同奶媽合唔合得嚟,仲講笑話如果卿姐唔想佢做就唔做喎,卿姐即時扯高八度話佢:「你唔好亂晒大龍,用吓個腦先講啦。」同卿姐講笑,阿聰真係「離晒譜」。
對於有乜意見畀林鄭,阿聰話林鄭喺最新一輪民望評分唔係太差,認為社會上有人認同林鄭抱持嘅價值,林鄭應好好經營同呢班人嘅關係,「你點樣同呢班人建立關係、信任,過程係緊要,過往政府係少去經營呢件事」。至於曾俊華今後何去何從,阿聰就話,相信薯片叔叔對組黨應該冇興趣,而地區直選亦非佢專長,又透露薯片叔facebook喺選舉結束後,有成30萬個「朋友」。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載