› 選擇地區
三藩市
紐約
洛杉磯
其他美國地區
香港 台灣 北美
 
2017年04月06日

隔牆有耳:傳揸弗教局 民政局 商經局
奶媽未招手 大師:Call我! - 李八方

候任特首林鄭月娥呢排忙住搵人入熱廚房,不過自從林鄭當選以來,下屆班子人選傳言滿天飛,可以肯定嘅係教育局局長「唔得掂」冇得留低,至於邊個接手呢?有辦學經驗、做過立法會教育事務委員會主席嘅前立法會議員林大輝就有傳係人選之一,不過大輝噚日上電台節目澄清冇諗過做局長,笑言最淒涼係俾人傳咗咁耐都冇人搵佢,呼籲林鄭「快啲call我」。
大輝講開近日關於佢做局長嘅傳言,先傳佢做教育局局長,跟住就有人問佢係咪做民政局局長,最近仲問佢係咪做商經局局長!令大輝突然覺得自己嘅才能好多元化。佢話自己知自己事,到呢一刻都唔覺得自己適合做現屆或未來數屆問責局長喎,仲畀高帽許曉暉同劉江華戴,話二人各有能力勝任民政事務局局長一職。
另一邊廂,金融服務界立法會議員張華峰就比較關心財金官員花落誰家。

相關新聞:隔牆有耳:候任辦傢俬大部份二手

肥老闆憂中資大班做財爺

林鄭政綱提到成立金融領導委員會,而佢嘅金融政綱係由金管局前總裁任志剛及中證監前副主席查史美倫協助草擬。唔少人傳本身係林鄭中學師姐嘅查太都獲「分餅仔」,不過張華峰就明言有啲擔心,因為查史做金發局主席,發表咁多份報告,冇一份提及中小企呀。
𠵱家盛傳財爺人選王冬勝係匯豐銀行大班,張認為外資冇關係,申報清楚就得啦,反而中資銀行出身,由於本身意識形態唔同,做局長都仲可以,但財爺就未必咁合適。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載