› 選擇地區
三藩市
紐約
洛杉磯
其他美國地區
香港 台灣 北美
 
2017年04月04日

八方相當年:讀港大遇星探 五音不全拒做歌手
法政男神 後悔拍廣告 - 李八方

38歲嘅蔡騏早前接任法政匯思召集人後爆紅,青靚白淨輕易成為社運圈新一代男神。法政男神唔係浪得虛名,2000年港大讀書時已經喺街上俾星探發掘,「我唔驚死咪上去」,試鏡成功兼拍咗處男作,為一間便利店做廣告男主角,青澀澀嘅佢喺片中有「歡迎光臨」、「多謝晒」等對白㗎(竟然咁多年後仲有片睇 https://youtu.be/q21npmBGvK8 ),但佢笑稱後悔下海,「𠵱家都不斷俾舊同學笑㗎!」

中學寸寸貢被排擠

人人選港姐都話陪朋友面試,蔡騏就坦承因為貪玩自動獻身,但堅稱有自知之明,冇諗住走入演藝圈,原來星探仲問佢有冇興趣做歌手,「我話唔係呀嘛,我五音不全喎」,之後專心讀書,其間拍過一啲政府宣傳片!
現為大律師嘅佢畢業於青衣樂善堂梁植偉紀念中學,佢話細個多嘴兼讀書唔叻,中四先發憤,記得會考放榜前,大佢三年嘅家姐問使唔使陪佢搵學校?「佢平時好cool又冷若冰霜,所以好感動」,最終成績好原校升學,仲入埋港大讀法律,係曾俊華前政助羅永聰嘅同學。
除咗家姐,佢仲有個遲佢10分鐘出世嘅孖生細佬,但完全唔似樣、冇俾人認錯,指細佬運動型係校草,自己性格斯文同佢相反,自爆中學時被排擠,唔多合群,「可能寸寸貢、自以為是,太乞人憎」。
蔡騏仲話那些年係星矢迷,「我係宅男,聖鬥士星矢嘅模型、漫畫書、卡呀、畫集我都有儲㗎」,蔡騏笑嘻嘻指:「佢哋似一班乸型喺度打交,唔係爆肌型,個個瘦蜢蜢,好似我咁。」

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載