› 選擇地區
三藩市
紐約
洛杉磯
其他美國地區
香港 台灣 北美
 
2017年03月31日

隔牆有耳:十年前拆囍帖街 昨日重臨利東街2.0
奶媽賜餅 市民冇份 - 李八方

候任特首林鄭一派餅,攝記全部退後先影到塊$21離地曲奇。
易仰民攝

候任特首林鄭當選後噚日返去母校嘉諾撒聖方濟各書院,離開時親自「落山」,順便重返昔日親自摧毀嘅囍帖街。昔日嘅囍帖街係專賣印刷囍帖嘅唐樓建築群,但唔好忘記2005年市建局無視部份原有居民及商戶嘅反對,強硬宣佈收回利東街的業權重建,後來2007年尾,時任發展局局長林鄭會見反對重建嘅商戶後,話囍帖街舊樓缺乏歷史價值,囍帖街搖身一變就成為現時聚集貴價商舖嘅離地利東街,只剩下很少與婚宴有關的商舖。
事隔10年,林鄭噚日重返舊地,好諷刺就係去利東街新商舖GINZA WEST買日本手作曲奇畀跟足半日嘅一眾攝記,但攝記為咗影派餅場面全部即刻後退,林鄭唔明,笑笑口話:「你哋做乜退後,畀你哋啊!」有個別攝記畀面接過曲奇。之後有市民行過又想拎曲奇,點知得到林鄭一句:「市民唔得呀,我淨係畀記者咋!對唔住!」市民即刻感嘆話:「我唔係記者呀,我係普通市民嚟㗎咋!」

花千元買曲奇

林鄭話,GINZA WEST係佢食開嘅餅店。八方即刻睇吓價錢,呢間餅店嘅曲奇價錢都幾離地。GINZA WEST標榜出售由日本空運到港嘅手作曲奇,最平單塊曲奇賣21蚊一塊,其他禮盒裝賣100至400蚊不等。林鄭今次就用咗924蚊買曲奇,當中買咗標榜「Best No.1」中產價420蚊嘅雜錦禮盒曲奇,禮盒內得22塊餅。另外買咗唔少21蚊一塊嘅獨立包裝曲奇,即係派畀攝記嗰啲。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載