今屆選舉論壇掀起一片「Fact Check」熱潮，網民以至傳媒紛紛就候選人嘅言論翻舊賬，其間發現大熱門林鄭月娥都有唔少言論有誤，例如佢多次批評勁敵曾俊華在任財爺時嘅預算案，斥對方財政管理保守，事實卻係林鄭過往多次讚揚預算案噃。自己的Fact自己Check，薯片叔唔再假手於人，自行「Fact Check」反駁林鄭指控，力證「『曾』的假不了」。
「今日的鵝打倒昨日的鵝」
薯片叔噚日喺facebook話呀，Factchecking係時下選戰最重要嘅一環，除咗各大傳媒用心查證事實真相，自己都希望用數字以及公開嘅傳媒報道，直接回應林鄭陣營喺選戰中對佢嘅兩項指控，包括政府係咪真係有巨額盈餘可以加開多項經常性開支，以及喺有足夠盈餘情況下仍然透過「0-1-1」削減開支係咪屬實呢。
有圖有真相，有片大家就唔胡思亂想。薯片叔特別貼出2013至2015年等政府新聞處嘅片段，當中可見，林鄭年年都讚佢負責嘅預算案噃，點解突然喺選戰時又會覺得預算案唔好嘅呢？相信薯片叔同心水清嘅讀者，各自心中有數，而薯片叔亦回應話：「要多謝林太2014亦曾表揚我的財政預算案務實而全面。」正面抽擊林鄭，獲得網上薯粉狂畀like，有網民贈興話：「今日的鵝打倒昨日的鵝。」
李八方
