› 選擇地區
三藩市
紐約
洛杉磯
其他美國地區
香港 台灣 北美
 
2017年03月16日

隔牆有耳:奶媽公開挖角 一夜爆紅
薯片智囊肥仔聰 跑馬仔大贏家 - 李八方

七大電子傳媒嘅特首候選人論壇,除咗一地花生,仲紅咗一個人,就係獲大熱林鄭月娥公開挖角、曾俊華嘅前政治助理羅永聰(阿聰)。薯片叔競選團打鐵趁熱,搵阿聰擔當撐薯片叔嘅短片最新主角,令大家睇吓呢位連林鄭都賞識嘅阿聰係何許人,難怪有政界中人笑指阿聰先係大贏家。

唔做傳媒做政助

38歲嘅阿聰為傳媒熟悉,皆因佢都係傳媒出身。名校皇仁書院畢業、之後升讀港大法律系,再攞埋新聞碩士,曾經去過英國牛津大學擔任訪問學人,係少數讀法律後委身傳媒嘅精英,喺《明報》工作時,仲短時間由法庭版記者晉至採訪主任,有時仲會執筆寫埋社論。
2012年11月,佢正式過檔做薯片叔政助,由嗰時起薯片叔形象一洗頹風,成為民望最高嘅官員,呢幾年預算案演詞中唔少為人記得嘅佳句,都係出自阿聰手筆。
阿聰喺挺薯片嘅短片透露,1月19日薯片叔宣佈參選當日,薯片叔睇網友對佢嘅留言睇到喊,好多謝對方願意為香港參選,畀咗呢個機會等大家發一個夢,示範一個政治領袖都可以爭取到香港人嘅信任支持,認為將來每一個從政嘅人,都唔能夠唔正視如何爭取港人支持,佢仲透過短片同薯片叔講,從政嘅人做到乜唔係最重要,而係老百姓點樣記得佢。
呢位另類大贏家獲唔少政界好評,同阿聰交過手嘅民建聯立會議員劉國勳都話戥對方高興,「佢唔單止獲老闆認同,連同佢老闆競逐特首嘅人都睇到佢成績喎,仲唔係大贏家?」佢大讚阿聰醒目、爽快兼貼地,最重要都係老闆信任佢,「100%放心畀佢發揮所長」。
八方相信就算林鄭重金禮聘,都未必請到阿聰,因為合唔合拍,都好關鍵。薯片叔就喺fb感激佢口中嘅「肥仔聰」喺選戰中畀嘅建議同判斷:「希望在未來5年,我們能繼續一同拍住上!」

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載