› 選擇地區
三藩市
紐約
洛杉磯
其他美國地區
香港 台灣 北美
 
2017年03月11日

隔牆有耳:
棄選後西環冇安慰 
葡萄儀變苦瓜 董伯送暖:唔好bitter - 李八方

噚日葉劉杯啡有奶冇糖,除咗bitter仲有乜暗示先?馬泉崇攝

新民黨葉劉宣佈棄選特首10日後,噚日就約傳媒茶敍,一邊飲住杯「有奶冇糖」咖啡,一邊講自己感受。葉劉話,棄選後西環冇正式約會自己,但送上安慰嘅人唔少,其中佢特別感謝一直盛傳力挺奶媽參選的「老董」董建華,老董仲特別叫葉劉唔好bitter!
葉劉話老董喺佢棄選後特別約佢見面,不但打咗幾次電話畀佢,仲搵佢食飯,葉劉話︰「佢(老董)話我好有鬥志,話『你唔好灰心呀,唔好bitter呀』咁」。八方想知董建華有冇叫佢改撐奶媽,葉劉即話「冇冇冇冇冇」。

藉港視寸奶媽冇承擔

雖然葉劉冇得參選,但唔代表佢嚟緊冇角色,今個月18號,佢個新民黨就會搞場座談會,邀請奶媽、薯片同胡官先後出席回答問題。葉劉噚日講明,自己唔會公開投畀邊個,話要尊重暗票制度,亦不會綑綁新民黨選委投票。
棄選後自稱「一場辯論都冇睇到,因為自己好唔得閒」嘅葉劉又話,唔少電視台都邀請佢做評論員,但佢擔心評論完之後,「又俾人話我酸葡萄」,所以要好審慎咁行事咁話。至於三名候選人表現,葉劉就話︰「一個係棟篤笑,一個有親和力但冇乜內容,一個就熟書但好官僚。」
早前因為689讚奶媽「有承擔」而落淚嘅葉劉,對奶媽聲稱港視發牌事件事不關己嘅說法特別上心,批評「典型官僚答案」,話奶媽身兼行會成員「有份落鎚」,唔可以話自己冇責任,強調自己當時都係行會成員,「我就有份撐政府,呢啲就叫做承擔嘞」。

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載