› 選擇地區
三藩市
紐約
洛杉磯
其他美國地區
香港 台灣 北美
 
2017年02月25日

飛行里數易儲咗
達人教你1年換13套機票

廉航越嚟越多,究竟仲有冇人沉迷儲飛行里數呢?答案係有嘅。亞洲萬里通行政總裁黃思遠同費清講,今年1月會員已經突破900萬人,增長10%。好多人用里數換日本機票,其實日本已經有好多廉航啦,要平換機票,黃思遠推介去蘇梅島,皆因蘇梅島機場屬曼谷航空,香港直航機一向好貴,依家要3月飛去,最少都要5,000蚊起,但用3萬分里數就換到機票,與其用相同里數去東京,不如去蘇梅島,東京留番畀廉航啦。

講起儲里數,最勁當然係曾經一年內換咗13套機票嘅「里數達人」小斯,連亞洲萬里通嘅職員都要請教番佢。小斯話,其實依家儲里數好生活化,唔係吓吓要碌卡碌大數,依家電子貨幣開始盛行,除咗八達通可以計里數,仲有Apple Pay同Android Pay,所謂小數怕長計,加上Apple Pay同Android Pay推出無耐,成日都有優惠,有時洗幾十蚊,都有成幾百分里數。

舊年渣打亞洲萬里通信用卡推出時,因為太多人申請,好多人要等幾個月先出到卡。小斯就教路,平時去亞洲萬里通嘅合作食肆簽帳,簽帳2蚊有1里數,但每月11日除咗每簽帳1元有1里數,再用渣打亞洲萬里通萬事達卡簽帳,每簽帳4蚊仲有1里數,一餐飯如果食咗1,000蚊,咁就有1,250分里數喇。

窮L想去旅行,又唔想瘋狂消費儲里數,其實都有計,係TripAdvisor用繁體中文撰寫留言,評價酒店及食肆等,每則評論最多可以賺50里數,每月最多1,500里數。

費清有朋友試過唔記得帶卡出街,白白冇咗4,000分,扼腕至今,想提提大家,其實依家出示亞洲萬里通個手機app就得,記住啦。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載