› 選擇地區
三藩市
紐約
洛杉磯
其他美國地區
香港 台灣 北美
 
2017年02月17日

早上西裝友 晚上變裝皇后

【本報訊】同樣是性小眾,雙性人細細老師的成長充滿血淚,努力在機制內爭取平權,20出頭才發現自己只愛男人的Bryan,就寧願在小圈子自由馳騁。「人哋欺凌我,我咪欺凌番人囉,你叫我乸型,我都可以話你肥同醜之嘛」。自信又潑辣,天生蘭花手的他,是基界最紅的變裝皇后(Drag Queen)。早上,他是穿着貼身西裝,在雜誌社工作的上班族;夜幕低垂,他是踩着5吋高跟鞋、穿上紅色搶眼珠片裙魚網絲襪的夜店女皇Coco Pop。「我同樓下看更講,我係紅歌星,咪着成咁囉!」少見才會多怪,他大笑。

相關新聞:盼為母洗污名「唔係佢嘅錯」

「你話乸型 我就乸到盡」

走進Bryan西營盤的家,首先映入眼簾的是低胸女子軍服。「上年專登為同志遊行訂做,綠色做主題,我嫌出面啲綠色衫太普通,又肉酸」。姿整又要求高,他不諱言自細已被叫乸型,但不在乎。「最終極嘅對抗,係你話我乸型咩,我就乸到盡,紅畀你睇、威畀你睇,人哋出錢請我出騷,你得唔得吖」。廿歲出頭先出櫃,他說「起步遲」,要追回失去的時間:變裝、搞同志雜誌,甚至去基吧客串做侍應,小圈子內,如魚得水。
Bryan不是總「頭耷耷」那種主流性別世界認知的所謂「基民」,生得高大,自小朋友多,表演慾強,最愛徐小鳳的傘形波波裙,偶像是百變梅艷芳。人生一次難堪是為索取演唱會門票,致電電台高歌卻遇滑鐵盧,「我話要唱阿梅嘅歌,聽電話嗰個話唔得,因為男人要唱番男歌星嘅歌」。
主流世界排擠,在變裝的國度,燈光很暗、圈子很小,小得只限基吧、私人派對、成人博覽,但這裏他可盡情發揮。「我嘅聲線,唔男唔女,上天賜畀我,點解要嘥?」玩造型、做女皇,台下的粉絲,付豐厚貼士以示欣賞;這裏的人,會為Lady Gaga找來Drag Queen伴舞奔走相告,興奮莫名。早離家獨立的他說:「百變Coco係我,Bryan亦都係我。」男人四十,決心仍會Drag下去。
■記者呂麗嬋

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載