› 選擇地區
三藩市
紐約
洛杉磯
其他美國地區
香港 台灣 北美
 
2017年02月02日

不認同公民抗命「犯咗法保護唔到市民」
法政男神用智慧抗爭

【本報訊】抗爭不一定要激,法政匯思新召集人蔡騏選擇「文鬥」,「我唔係衝擊型,係智慧型」。前年俗稱網絡23條的《2014年版權(修訂)條例草案》戰役,夥鍵盤戰線以文宣及游說戰報捷;於人大8.31的法治風暴下登場,力保終院外的泰美斯女神像不蒙污。以版權戰「起朵」的新一代律政男神表明,會專注網絡自由及私隱條例。
記者:許偉賢

「其實最初係覺得佢哋(鍵盤戰線)有啲騎呢,走去扮法輪功解剖屍體(請願)喎!」蔡騏笑笑口說。與鍵戰的情緣,始於有高登仔被高登網「踢走」,查詢法律意見,其後談起版權法,「嗰時知道會翻生,但都唔多熟悉,去到見到呢班年輕人嘅presentation有紋有路,冇諗過一個『廢青』組織咁well-prepared,好impressed」。

相關新聞:自嘲中坑 封陳文敏偶像

自覺網絡23條戰失敗

擔當法律顧問,狂「咪」版權法例,約見外國專家學者,製作懶人包揭魔鬼細節,蔡騏憶述那段作戰「苦」日子,「寫完啲文章甚至會畀啲學者睇,確保冇錯,因為本身真係唔係專長」。最終在泛民助攻下,《版權條例》被拉倒,外界認定是反對者的勝利,蔡騏直言,「我哋覺得係失敗,因為唔係唔想條條例過,而係想修訂,先至提出有建設性嘅proposal」。
他強調當時抗爭很斯文,「都係提出建議書、去聽證會,同人講道理」。時值雨傘運動,他曾獲邀到大台解說條例,「瞓喺街就冇,條腰頂唔順」。
問他是否支持公民抗命?「唔好做啦,哈哈」,說笑後正經道,不認同法律界進行公民抗命,「否則犯咗法就保護唔到其他市民」,又明言激烈抗爭之時,必須考慮結果。遊行當然沒問題,他的處男上街就在2003年,剛畢業的他深怕言論及表達自由受影響,「咪行出嚟捍衞,嗰時覺得香港人好團結、香港好有希望」。

「每次釋法都衝擊法治」

隨後香港五度人大釋法,令他覺得法治越來越危險,「每次釋法,都係對法治嘅一次衝擊,最近一次釋法(議員資格)都冇咁嘅必要;有啲權喺度,唔一定要用」。人大就政改作出8.31決定,至今令他意難平,「覺得佢哋係撕爛塊面,唔同大家講道理,佢哋話乜就要乜,其實佢哋係想操控個選舉,話畀你聽:揀呢個就呢個!」
接任法政召集人,關注司法人權等是必然,網絡自由及私隱權亦是主打,在終院外看到一則有關現場設閉路電視、涉及收集私隱的相關啟事,他即時以手機拍照做記錄。斯文書生型的他明言,抗爭手法不會變,「唔係衝擊型抗爭,係智慧型」,呼籲市民有需要時發聲,「無論民主法治與自由,都係好脆弱,如果唔行出嚟捍衞,好自然被侵蝕」。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載