› 選擇地區
三藩市
紐約
洛杉磯
其他美國地區
香港 台灣 北美
 
2017年01月19日

隔牆有耳:傳承董伯父權 煲呔官威 689鐵腕
三合一奶媽 膽大是這樣煉成的 - 李八方

由好打得到局長奶媽,已經辭任政務司司長嘅林鄭月娥近期最為人熟悉嘅封號已經變成CY 2.0,皆因佢話睇吓能否延續梁振英施政理念,但呢一點即時令佢俾民主派排拒,話明唔肯畀票佢。活在CY陰影下,林鄭相信冇乜運行,而有政界花生友話,林鄭豈止CY 2.0?佢其實集齊3任特首嘅特質。
強硬路線唔使講啦,同俾中央突然DQ嘅梁振英好相近,例如話明西九唔使諮詢,擺明同民主派開拖,點會唔似敵我分明嘅CY?至於講過官到無求膽自大,大鬧唔應該逼官員飲鉛水嘞喎,其實都幾有上屆煲呔曾嗰種港英政府浸淫出嘅官威㗎。而佢近期多番提及,參選係因為熱愛呢個城市,以示希望出一分力,亦同首任特首董伯伯嗰種家長式姿態類近,真係留低比離開更難咯。咁仲唔係集3任特首大成?

奶粉嫌西環幫倒忙

有咁多前人影子嘅林鄭,要開闢自我一片天,相信一啲都唔易,尤其中聯辦強勢幫拖,令部份建制好反感,有林鄭支持者話咁樣係幫倒忙,大呻其實冇叫過亦唔想西環出手喎。
查實西環開足火力推林鄭,可能因為港澳系統官員支持有關,因為坊間一直有傳主管港澳事務嘅張德江向主席習近平交咗推薦林鄭嘅奏摺,下面自然反應好大,紛紛開工造勢,但問題係手握跑馬仔關鍵一票嘅習大大,至今未批回奏摺,又難怪唔少選委都話要睇定啲、慢慢嚟。
有指林鄭至今攞到超過400票,同601票當選仲有距離,又難怪有心造王嘅西環咁緊張嘅。唔知極有可能攞民主派提名票入閘嘅曾俊華,會唔會感激西環強力打壓,變相放佢一條生路?

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載