蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年01月18日
馬上成為壹會員

隔牆有耳:西環游說記之箍票凶鈴 
小明捧奶媽 煩音嚇怕建制 - 李八方

每逢選舉前,唔少建制派都好驚一樣嘢,唔係怕押錯注,亦唔驚冇得押注,而係好怕被迫押注,違背主觀意願。八方連日都講過,西邊強力部門已出手,想令曾俊華墮馬入唔到閘,以便林鄭入閘之時等同當選,動員方法無非係打電話傾偈或約見。據聞同類電話近期好頻密,有建制花生友笑稱𠵱家上演緊「西游(西環游說)記」,由中聯辦主任張曉明擔正;唔少人就話怕咗「奪票凶鈴」,索性唔接電話暫時免煩惱。
正所謂食得鹹魚抵得渴,做得建制派,都知道有代價嘅,至少所謂中央嘅意見,不可以不聽。身兼港區人大代表、新民黨副主席田北辰都講得好白啦,話最近聽到好多聲音,有「無形之手」想只係捧一位建制派人選入閘,連佢都收到電話,「有人」向佢拉票,不滿有人逼佢要畀綠帽葉劉戴。邊啲人咁落力?呼之欲出啦!

相關新聞:隔牆有耳:大輝大師頓悟 改撐林鄭?

鍾國斌唔聽電話

上月底曾經講過,唔覺得薯片叔叔冇出選機會,甚至話薯片叔叔真係遇到「紅燈」、都應「衝紅燈」參選嘅自由黨黨魁鍾國斌亦坦承,近期連番收到「奪命追魂call」(話就話奪命,查實當然係追票),佢話有啲電話都冇聽;至於點解唔聽……相信大家都懂的!
八方唔知呢齣由中聯辦主任張曉明擔正嘅2017年嘅政壇版「西游記」,最終係票房大收、抑或慘淡收場?但相信無論好唔好睇,都會帶旺花生同爆谷大賣。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載