蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年01月02日
馬上成為壹會員

隔牆有耳:
跳戀愛舞賀年 
游BB 葆葆 一齊逃恥 - 李八方

新垣結衣同星野源主演日劇《逃避雖可恥但有用》上個月已經喺日本播出大結局,之不過主題曲《戀》繼續受追捧,之前連美國駐日本大使嘉露蓮甘迺迪都換上聖誕裝大跳戀愛舞,可見呢首歌幾受歡迎!

感謝黃埔街坊去年鼓勵

而喺2017年元日,青年新政游蕙禎同前青政成員、黃埔區區議員鄺葆賢合辦嘅「小黃紙」亦加入舞團,夥拍街坊同其他地區組織成員齊跳戀愛舞,藉此同市民賀新年,而最吸睛嘅當然係游BB啦,有網民大讚可愛兼有活力!
唔好以為只有女仔先跳得好,東區區議員徐子見等人獻技,一樣好有勁;東九龍社區關注組陳澤滔就帶住隻「東九龍」恐龍一齊跳,雖然跳到亂晒龍,但誠意十足兼極富娛樂性,輕易又呃到like!

小黃紙facebook專頁就貼文話,2016年係改變嘅一年,感謝黃埔團隊同街坊嘅付出同鼓勵,令佢哋可以喺高低起跌中成長,克服唔同嘅挑戰,亦慶幸識咗好多喺社區默默耕耘嘅人,「2017年,希望更多的人加入,以社區作為單元,重新認識每日在身邊的人和事,繼續社區起義」。
講到高低起跌,八方相信游BB特別感觸良多,由前年落敗區議會,到去年成功循九西殺入立法會,但最終因為宣誓風波被褫奪議員資格,新一年就要面對宣誓案上訴到終審法院,趁新年可以同戰友跳吓舞,都算難得嘅輕鬆時光。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載