蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年12月16日

隔牆有耳:太陽升起7次
小明去了哪裏?

14,045

呢期政圈熱門話題,除咗熱估下屆特首「真命天子」,就係中聯辦主任張曉明行蹤。小明由上周六突然缺席工展會開幕,到噚日差不多一個星期冇現身,噚晚小明又缺席政府人員協會30周年聯歡會,令政圈傳佢繼梁特冇得連任後,將成為下一個被「處理」嘅人。不過有政界中人話,之前傳過小明要被問責調走,但次次都係流料,要小明走似乎真係冇咁易!
政府人員協會會長孫名峰噚日回應傳媒查詢,話已收到消息小明唔會現身,會由副主任林武頂上。計埋大大話話缺席3個公開活動,特別係南京大屠殺悼念活動,作為中聯辦主任,除非萬不得已,否則冇可能no show!而政協常委陳永棋噚日被問到小明去咗邊,佢話對方應該喺北京開緊會,又話完全聽唔到小明要調走。

後台夠硬 隨時回歸

政圈盛傳梁特冇得連任,代表中央要出手整頓港澳系統。建制派喺之前區選、立會選舉表現唔好,到今次選委會選舉直情慘敗,加上盛傳西環捲入涉嫌受賄嘅華潤集團前董事長宋林案,小明作為西環之首,今次去北京唔只開會咁簡單,而係要檢討交待,甚至有傳佢未必會再返香港!
不過有政界中人話,小明後台都幾硬,北京有人撐佢,要調走佢唔係咁易,否則唔會傳咗咁多次調走都依然坐喺香港做山寨王,日日寫大字、睇住太陽照常升起!再加上好巧合地,青政梁頌恆、游蕙禎雖然冇錢,但呢個星期突然話要就宣誓案上訴到終院,港獨勢力又再出現,小明就更加大條道理,繼續坐鎮西環,駕馭香港複雜政治形勢。

李八方
mailto:pf_lee@appledaily.com

李八方

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載