› 選擇地區
三藩市
紐約
洛杉磯
其他美國地區
香港 台灣 北美
 
2016年11月09日

推生涯規劃
校長:唔係幫學生揀路

負責老師蘇昌華(左)指初中開始生涯規劃,可及早關顧學生個人成長。周智堅攝

【本報訊】教育局局長吳克儉早前分析學生壓力成因時稱,個別學生未做好生涯規劃,揀錯科就「頂唔順」。有中學生反指,擔憂揀錯科或入錯行、「升唔到大學就冇前途」等主流價值觀,正是壓力來源,更自小被家長灌輸「讀唔好書就做乞衣」。瑪利諾神父教會學校推動的生涯規劃,卻不止於吳克儉口中的選科就業。校長何力生強調必須融入生命及心靈教育,「所謂生涯規劃,唔係幫佢揀一條路,係幫佢預備點揀一條路」。
記者:周婷

相關新聞:用教局津貼請人利長遠發展

瑪利諾神父教會學校在中一、二級就開展生涯規劃,主要幫助學生自我了解成長需要、特質、天份及興趣等,升上中三才會指導如何選讀高中科目,中四級則教學生服務他人,例如擔任學會主席、幹事等,最後兩年才會主力關注學生的成績、應付公開考試態度。

初中起步 融入生命教育

校長何力生解釋,提早開展生涯規劃並非要由中一開始「話畀佢知做邊行」,而是及早關顧學生的個人成長,他指初中生其實「最難搞」,因年紀尚小、性格「冇譜」,故強調將生命及心靈教育融入生涯規劃課。該校職業輔導及生涯規劃組長蘇昌華老師解釋,初中起步有助學生了解自身性格、志趣,及早學習控制情緒。他剛開始接手工作時,亦曾一心想「幫學生揀條好路」,但慢慢體會人各有志,現在更加着重教學生反思社會價值觀,例如「係咪一定要讀大學?搵工要高薪?追夢點兼顧現實?」
新高中學制強調選科、升學路向多元化,但未能撼動追捧讀大學的主流價值。該校中三學生林寶怡坦言,長輩的期望與偏見是壓力來源之一,「媽咪成日都會話:『如果你讀唔好書,你一定會做乞衣,你想唔想呀?』咁樣嚇我哋。」她自問校內成績平平,欲在高中選修視覺藝術,除了因為興趣,她笑言藝術科「唔使背書」。學校的生涯規劃課教曉她面對課業壓力、不強迫自己,「溫書溫到攰就深呼吸,合埋眼休息一陣」。她亦學懂應對母親,「我會自己搵好多資料,知道讀唔到書、都可以創業,唔一定要跟住(升大學)條路行,將來見步行步啦」。
寶怡的大師兄、中六生許明陽即將應考本屆文憑試,面對大學選科,有時壓力超出負荷,「自己𠵱家未正式成為大人,心智都未預備好面對抉擇,自己成日會諗,做錯一步,會唔會令將來做唔到自己想做嘅事呢?」不過他笑言,學校生涯規劃課有助他認識各學科,更重要是學懂勿鑽牛角尖,「總會有路畀自己行,只係會唔會兜遠咗、冇咁直接」。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載