› 選擇地區
三藩市
紐約
洛杉磯
其他美國地區
香港 台灣 北美
 
2016年11月02日

隔牆有耳:經民聯晚宴 冇咗一男子「喜歡你」
財爺 卡片蘇 合皮大合唱 - 李八方

經民聯成員同一眾高官合唱《My Way》,曾俊華、譚志源同大家打成一片,蘇局長嘅投入,同梁君彥嘅硬晒軚成強烈對比。

經民聯係繼民建聯外,最多立法會議員嘅建制派政黨,係議會「堅實嘅保皇黨」,再加埋佢哋前主席梁君彥做埋立法會主席,噚日該黨舉行4周年慶典暨晚宴,問責班子幾乎傾巢出席,由特首梁振英、三司到各個局長、常秘等都有畀面出席,加上政商界猛人,筵開38席,場面墟冚。

梁君彥把口撬唔開

官員出席晚宴,好多時露一露面就走,不過噚晚唔少官員都食到最後先走。
幾個疑似特首候選人同場同枱,難免令人覺得暗中較勁,睇吓邊個多朋友啲,邊個最多人上前集郵等,八方單憑目測嘅「科學」統計,「奶媽」林鄭、財爺各有千秋,至於梁特因為早走,所以難以比較,不過財爺之後獲邀上台同眾人大合唱,而奶媽就無上台,當中有乜微言大義,就各自諗喇!
去年CY喺經民聯晚宴同Beyond成員黃家強合唱《喜歡你》並上載至facebook惹來版權風波,不過昨晚梁特由於一早走咗,所以大家無緣再聽佢歌聲。
咁噚晚嘅唱歌環節自然係高潮所在,晚宴後段,經民聯一眾核心成員拉埋眾司局長齊齊大合唱,先後唱咗《My Way》同《獅子山下》,曾俊華、譚志源都有參與,蘇錦樑直情合皮到好似自己開騷,袁國強表現怕醜,咪以為梁君彥口大就一定係「咪霸」,彭耀佳隊埋支咪畀佢,都撬唔開佢個口!
另外噚晚焦點除咗係特首選戰,梗係仲有中央會就宣誓案釋法,一眾政界人士聚頭梗係議論紛紛,作為立法會主席,梁君彥梗係俾大家追住問,不過佢就一再重申自己係最孤獨嘅人,所以中環、西環,各個政黨有乜風聲佢都收唔到喎,真係信不信由你。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載