› 選擇地區
三藩市
紐約
洛杉磯
其他美國地區
香港 台灣 北美
 
2016年10月24日

隔牆有耳:
跑馬仔三熱門 惟獨冇挺CY 
阿松撐完財爺讚林鄭 - 李八方

特首跑馬仔賽事,最近因為青年新政梁頌恆同游蕙禎嘅宣誓風波,出現變數,外界相信有意爭連任嘅梁振英從中獲利,因為阿爺或者會更想搵個硬淨嘅人做特首,所以有傳財政司司長曾俊華嘅選情又墮後,唔想梁振英連任嘅人,或者對此都好失望,希望有個中央接受嘅強硬派出嚟,同CY決一死戰都好。唔通因此令前財爺梁錦松,鬍鬚曾同林鄭兩邊撐,惟獨CY就無份?
相信大家都好記得,由阿松任主席嘅「惜食堂」,本月初請咗鬍鬚曾做活動嘉賓,阿松致辭時狂向鬍鬚曾畀like,希望惜食堂能令香港更團結,仲話呢個責任要「交畀曾司長啦」,表明對佢好有期望。

想林鄭繼續服務香港

事隔約兩星期,身為國際小母牛香港分會主席嘅阿松,噚日就喺小母牛活動邀請咗林鄭做主禮嘉賓,不忘向林鄭讚好。佢致辭時話呀,希望林鄭繼續為香港貢獻力量,服務香港。言猶未盡嘅佢其後喺活動再解釋,大讚林鄭喺各方面表現都好好,如果佢能夠繼續為香港服務,係一件好事!嘩,讚到天上有地下無,咁林鄭係咪下任特首嘅合適人選?阿松聽到反而未有回應。唔通都係驚方丈?所以冇挺過CY嘅佢覺得點到即止,等人心領神會更好?
李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載