› 選擇地區
三藩市
紐約
洛杉磯
其他美國地區
香港 台灣 北美
 
2016年10月22日

隔牆有耳:
梁繼昌風假玩甜蜜啪 
焗爐爆炸險死 - 李八方

梁繼昌個焗爐炸到一地玻璃碎,未知會否引起大文豪文興大發?

立法會噚日因為掛8號波唔使開會,唔少議員都各自搵節目,公專聯梁繼昌就同太太匿喺屋企玩煮飯仔,諗住甜甜蜜蜜過番個突然多出嚟嘅假期,點知佢真係唔好彩,煮飯仔玩唔成不特止,仲搞到屋企爆炸,炸到成地玻璃碎,Kenneth話幾乎被炸死!不過完全唔關颱風海馬嘅事,亦唔係佢用咗Note 7,而係佢屋企個焗爐出事咯!

壞恒溫器 熱爆玻璃

Kenneth噚日朝早喺fb貼文,話海馬未打到嚟,佢差啲命喪於屋企一次小型爆炸!八方睇見Kenneth咁講都嚇一跳,立即打畀Kenneth問佢乜事?佢同八方講,平時佢一個禮拜都會搵一次焗吓嘢食,好似啲牛扒呀、麵包呀咁樣,噚日老婆咪諗住整番個香蕉麵包,始終自己整少啲糖,健康啲嘛。
而個焗爐呢,之前個恒溫器都壞壞哋㗎喇,令個焗爐到咗預設溫度都唔識停,剛剛星期一先搵人整完,點知噚日又出事,仲搞到爆炸,佢相信呢次又係個焗爐不停加熱,卒之加到某個位頂唔順就成塊玻璃啪一聲爛晒,然後一地玻璃碎,好彩冇人受傷咋。
佢仲呻呀,部焗爐係好出名嘅德國製品牌,數埋都用咗幾年,本身幾好用㗎,今次咁樣爆法真係好離奇。雖然佢話將來仍然對德國製有信心,但係仲幫唔幫襯呢個品牌,就睇吓佢哋呢次整成點先。咁又係,如果德國製都爆玻璃,咁中國製咪會爆出蘑菇雲?Kenneth都係小心啲揀過個焗爐喇。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載