› 選擇地區
三藩市
紐約
洛杉磯
其他美國地區
香港 台灣 北美
 
2016年10月01日

隔牆有耳:
立會小學雞 
以為去威先要戴頭盔 - 李八方

立法會秘書處一連幾日同候任議員搞迎新,噚日最後一日帶佢哋參觀立法會,途經記者室,西環新契仔何君堯見到有報館擺埋頭盔喺度,即刻笑住話:「戰爭狀態喎,頭盔都有埋喎!」民建聯周浩鼎即搭嘴:「哈哈哈哈!啲頭盔係乜嘢作用㗎?」Well……鼎,你太年輕了!唔通唔記得佔領嗰陣立法會外面係幾咁兵荒馬亂?

何、周一唱一和,何君堯話:「要去威嘅時候戴嘅!」有記者即刻反駁話係採訪佔領保護自己用嘅,一班議員先「哦!」咗一聲,茅塞頓開。民建聯劉國勳加把嘴話:「我送啲靚啲嘅頭盔畀你哋啦!」不過在場記者認真啃唔落,直截了當話最希望係唔使再戴啦。

陳沛然幸未食過催淚彈

醫學界嘅陳沛然就貪得意戴咗個印住Press嘅記者頭盔,佢話佔領時加入咗歐耀佳醫生嘅醫療隊,好彩未食過催淚彈,當時都冇戴過頭盔,但之前去工地參觀戴過。但佢笑住話將來可能需要戴頭盔,「我應該危險啲,隨時有人喺我後面掟嘢出嚟」。
其後新議員參觀圖書館,見到有「議員特藏」系列,陳列議員著作畀公眾閱覽,八方好奇,究竟鄺神暢銷小說有冇機會上架?鄺神聽到就話要寫本新書叫《有一種幸福,叫CY落台》,陳沛然搭嘴話:「我想要簽名版本!」

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載