› 選擇地區
三藩市
紐約
洛杉磯
其他美國地區
香港 台灣 北美
 
2016年09月19日

隔牆有耳:
累計21萬人次睇《蘋果》直播 
《城壇》收視勁 TVB走寶 - 李八方

港台王牌節目《城市論壇》噚日復播,點知向來直播節目嘅無綫揮劍斬情絲,唔再一如過往卅幾年逢周日中午12點喺翡翠台同《城壇》愛恨交纏,粉絲可能因此傷心鳥,好在仲有識貨之人,《蘋果》噚日直播,吸引累計逾21萬人次觀看,連主持人蘇敬恒都好滾動,大讚《蘋果》全程冇廣告,認真有趣喎!
唞暑後嘅《城壇》,首集討論選舉後嘅立法會新格局,兩位地區同功能組別票王,包括新西朱凱廸以及超區鄺俊宇同場現身,連同民建聯港島區候任議員張國鈞同新東落選嘅自由黨李梓敬,拍住蘇B撐起《城壇》。
節目開始前除咗切燒豬祝願新一季順利,亦向觀眾大派蛋形朱古力,唔少常客好似大陸朱繼續捧場,但近期因為「娥頸橋之戀」而爆紅嘅陳玉娥冇現身,有在場人士指娥姐可能去拍拖!

企鵝男學Tree根爆金句

無綫當《城壇》係草,證明佢哋走寶,好似企鵝男張國鈞噚日繼承鍾樹根「金句王」本色,將「劍拔弩張」講成「劍弩拔張」,都好有可觀性啦!雖則港台31台會同步播放,但蘋果動新聞網站同fb噚日亦直播,就連平時廣告時段冇直播到嘅「咪後」爭拗,亦畀大家睇埋。
噚日累計21萬人次透過《蘋果》睇直播,蘇B話好開心,佢話市民𠵱家睇節目模式變咗,後生仔都未必鍾意坐定定等夠鐘睇電視。而冇咗無綫,節目長咗近5分鐘,可以多啲台下發言。唔少網民要求《蘋果》每周直播,八方聽聞同事努力中,凡事有可能。

識睇睇留言

Vivi Cheng:TVX連有收視保證節目都唔播,抵佢收視及廣告繼續跌,跌,跌!
DeeDee Ooz:《蘋果》可因應每集剪啲精采位,吸引人上RTHK網睇。自己傳媒自己救!
Da da Chan:西環真係好on9,收編所有媒體,乜都唔畀做,結果所有節目和觀眾去晒蘋果網,蘋果更加壯大。
Gamegame King:大台已現死亡徵兆,死因是只得一種顏色,凡人沒法看懂。
Wilson WK:哎喲!原來唔使喺CCTVB睇城市論壇,正咁多㗎!真係多謝CCTVB停播,唔使再污染城市論壇!

資料來源:《蘋果》網頁及facebook

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載