› 選擇地區
三藩市
紐約
洛杉磯
其他美國地區
香港 台灣 北美
 
2016年09月15日

隔牆有耳:指做立會主席危害健康
因為愛田少唔撐細佬 - 李八方

下屆立法會主席之爭越演越烈,日前仲有新民黨田北辰自動獻身,話即使粉身碎骨都願意為社會做番啲嘢。講到粉身碎骨咁大件事,身為二少親大佬嘅自由黨榮譽主席田北俊立即反對,仲話作為錫細佬、關心細佬嘅人,點會想佢做主席呢?唔撐細佬坐上立法會主席寶座喎!
田少噚日喺電台訪問講到立法會主席人選,主持問佢二少做好唔好,田少就反問主持人有冇兄弟?然後就話:「如果你有個大佬、細佬你好關心嘅、好錫嘅,今日咁嘅立法會,你會唔會想佢做立法會主席?」八方聽到,真係差啲濕晒對眼呀……
田少解釋,佢自問都做唔掂大主席呢個位,事關做主席壓力大,揸緊啲《議事規則》就俾泛民鬧、揸唔緊又俾建制派鬧,連現任曾鈺成咁掂都做到兩邊唔討好,所以二少做都隨時做到出醜啦,況且二少年紀都唔細,為咗身體健康着想,佢一定會叫自由黨唔好撐二少,更笑言擔任此職比吸煙更加危害健康。

暗批葉劉別有用心

田少仲明讚暗批另一主席人選新民黨葉劉淑儀,話葉劉做就最ok,符合晒直選出身、夠資歷、和諧同熟悉《議事規則》等條件,質疑葉劉想做特首就搵二少嚟搞。而除咗葉劉,田少覺得民建聯李慧琼、廖長江同謝偉俊都啱坐主席位,話李慧琼勝在四平八穩、謝偉俊就企得夠中間,廖長江就熟法律兼同泛民有偈傾。可能二少聽落會覺得田少嘅話話逆耳,但忠言就係咁㗎喇。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載