› 選擇地區
三藩市
紐約
洛杉磯
其他美國地區
香港 台灣 北美
 
2016年09月06日

隔牆有耳:多謝阿爺欽點
西環四契殺入立會 - 李八方

大家前晚瞓唔瞓得着?八方都瞓唔着嘞,為咗選舉結果囉囉攣,最驚泛民稍有閃失,失咗議會關鍵否決權就大劑咯,好在最終選民都用選票幫手守護香港,阻止建制派任意橫行。之不過呢,中聯辦真係唔算輸得晒,至少兩位新愛將新界東嘅容海恩同新界西嘅何君堯,都成功入局,加上原有嘅九東契仔謝偉俊同九西契女梁美芬都順利連任,新一屆議會有一班「契」字派,唔知點樣為阿爺做世界?
謝偉俊喺九龍東以47,527票連任之時,梁美芬喺九龍西以第二高票49,745冧莊,呢對舊契仔、契女力保西環面子不失之餘,西環再有進賬,選前已經被高度看好嘅容海恩,一如所料喺新界東9席中佔一席;何君堯則喺新界西以35,657票險勝李卓人取末席,繼區選後再下一城。四位「契」字派喺立法會,唔知會唔會特別投契?

清一色來自法律界

大家有冇發現,西環「契」字派係有個共通點,登登登凳,就係清一色係法律界。而又咁啱得咁蹺,何君堯同謝偉俊同樣係律師;容海恩同梁美芬係大律師。而唔知大家知唔知,梁美芬2008年初次參選九龍西之時,身為佢城大法律學生嘅容海恩係有為佢拉過票㗎,唔通當時,已經種下呢段獲西環寵愛嘅因果情緣?
相信大家好想知,何君堯同容海恩係乜來頭,可以獲西環咁寵幸。54歲嘅何君堯老竇係何新榮,同陳日新、劉皇發齊名,號稱屯門三大元老,愛國背景唔使懷疑,而佢喺反佔中時咁出力,相信好打得作風深獲西環賞識。
至於39歲嘅容海恩,家族背景暫時未有大揭秘,但有傳媒曾報道,與佢同住嘅家人曾任國企高層,莫非呢個就係佢被寵愛嘅玄機?有傳西環喺新東「棄彪保容」,放棄工聯會鄧家彪而力保容海恩有一席,可見後台犀利!似乎西環力捧新人,已經有可見套路;如果要上位,有法律界背景顯然有優勢。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載