蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年09月03日
馬上成為壹會員

隔牆有耳:
馬季開鑼 盃賽頒獎 
特首行開  龍蝦頂上 - 李八方

話咁快,新馬季今日又開鑼,政務司司長林鄭月娥會入場主持打鑼儀式。開鑼日盃賽重頭戲照例係特首盃,今季安排比較特別,頒獎嘉賓並非由主持打鑼嘅林鄭月娥一手包辦,而係由特首夫人梁唐青儀負責頒獎,一反過去傳統,唔少人都估中間存在政治計算,但係喺馬會嘅角度,都只能夠主隨客便。

相關新聞:隔牆有耳:財爺啟程北上 話未計劃「面聖」

林鄭借歪改打鑼

眾所周知,今季開鑼改跑禮拜六日馬,係為咗遷就聽日舉行嘅立法會選舉投票日,其實對香港有更大影響嘅特首跑馬仔選舉,已經悄悄揭開序幕,雖然只係主持打鑼嘅林鄭就話冇興趣出選,但係人都知仲有大把變數,一旦林鄭決定去馬,絕對係可以左右大局嘅強手,有人唔想佢曝光率太高,都非常合情合理。
回歸以嚟,就算特首本人唔入場做開鑼嘉賓,政府起碼都派出三司做代表,偏偏林鄭同財爺曾俊華都有好高呼聲選特首,唔通唔想畀佢哋搶晒風頭,令爭連任嘅689蝕章?(財爺上咗杭州會習大大,機會難逢過頒特首盃啦!)八方仲記得689上次入場頒獎俾人噓到爆,仲有人掟雞蛋搞到秩序大亂,似乎都係唔蒲頭好啲,無謂令大家掃興。
印象中特首盃從未試過由特首夫人負責頒獎,特首搵老婆頂檔,唔知以後特首行開行埋,係咪由特首夫人做埋署理特首?689民望一直都好低,佢老婆梁唐青儀俾市民大眾嘅印象亦好唔到幾多,唔知馬迷有乜反應?與其嗌到拆天柴台,不如慳番啖氣,9.4去投票揀個代表到自己嘅議員仲實際。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載