› 選擇地區
三藩市
紐約
洛杉磯
其他美國地區
香港 台灣 北美
 
2016年08月27日

隔牆有耳:
同讀何母所創幼稚園 
大何 小周 曾是「同學仔」 - 李八方

今屆嘅立法會選舉真係一波未平一波又起,繼確認書風波、港獨派被取消資格之後,焦點就嚟到自由黨周永勤,同埋被指為「西環契仔」嘅何君堯身上。前日周永勤突然爆喊棄選,矛頭直指何君堯,何君堯噚日絕地大反攻,仲自爆原來佢哋兩個係校友㖭,唔通小周由細就俾大何蝦?
大家都想知,小周噚日作出大何口中嘅「無言的指摘」,到底係咪衝住大何而嚟。大何誓神劈願話唔知,仲爆料話幾年前佢哋「重新認識」時,小周叫大何做「同學仔」㖭,原來佢哋兩個都係良田幼稚園嘅學生。

「有賴我媽教導佢」

大何話良田幼稚園係佢一心要培育下一代嘅媽媽創立,當年同良田公立學校一樣非常有聲望,相信小周都係受惠良好嘅教育基礎,「喺呢個搖籃裏面成長,最後佢做到區議員,可能都有賴於我媽媽教導佢」,點知到今年7月小周對大何態度有變,相反佢就冇。睇年紀,大何大小周5歲,應該就唔係同期同學,唔知小周細時係咪一樣會爆喊、大何又係咪已經牙擦擦呢?
話時話,噚日大何記招仲有段小插曲。話說熱血公民派咗人去影大何記招,但不時俾大何嘅人遮鏡頭,直到記招開到差不多一半,大何先開聲話唔怕啦,人哋安份守己、拍係冇問題嘅,唔好阻佢,咁嗰位熱血人先得以安心影嘢。
其實何君堯又唔使對熱血公民嘅人咁大戒心,雖說噚晚熱普城候選人鄭松泰係咁狙擊佢,但當日如果區選冇鄭松泰狙擊何俊仁,同區何君堯又邊會有得贏?該區其他參選名單,請參閱本報立會選戰網站 http://hk.apple.nextmedia.com/legco2016/region 。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載