› 選擇地區
三藩市
紐約
洛杉磯
其他美國地區
香港 台灣 北美
 
2016年08月26日

【蘋果基金】「壹」起暢遊昂坪360
受助家庭暫忘煩憂

【本報訊】「身體健康」,一個看似簡單的願望,對於摯親經歷重病、甚至因病或意外離世的家庭來說至為重要。今個暑假,蘋果日報慈善基金再度與昂坪360有限公司合辦「愛‧昂坪360『壹』暢遊」活動,讓基金受助人家屬放鬆心情,與小朋友度過一日愉快的暑假。

記者:張珮琪
攝影:梁瑞帆、麥超億

今次共有13個家庭參與活動,一個風和日麗早上,40多人由東涌纜車站出發,搭乘纜車抵達昂坪巿集。參加者洪先生一家三口,另一名受助人阿君,與昂坪360 有限公司公司事務總管劉淑儀、及《蘋果日報》社長兼基金董事張劍虹一同乘坐水晶纜車。阿君笑說:「我係第一次坐昂坪360纜車,勁興奮!」

洪先生則說:「我哋第二次嚟,嗰時佢哋(子女)兩個好細個,3、4歲左右,今日再帶佢哋嚟都好開心,未試過坐(水晶車廂)底部可以見到下面嘅景物,佢哋都好好奇,成日發問。」現時7歲兒子樂樂及5歲女兒欣欣在車廂內放眼張望,對每件事物都感新鮮,樂樂突然伸手一指:「嘩,我見到𠵱度有船呀。」孩子此起彼落的笑聲,令車廂鬧哄哄。

參加者吳先生稱:「我初頭以為纜車好短程,原來咁長,沿途景色好好,天氣亦好好。」之後,一眾家庭參與問答遊戲,小朋友踴躍搶答贏取獎品;其間觀看《360動感影院》及《舞臺360》,均帶給眾人難忘的感觀及視覺體驗,大人細路樂在其中。此外,在《與佛同行》景點中,當參加者摘下一片寫上菩提智慧的菩提葉,並許下願望,吳先生直言:「希望屋企人個個都身體健康,最緊要祈求𠵱樣嘢,其他都唔重要喇。」

另一受助人家屬陳先生亦希望大家身體健康,小朋友快高長大,「我都想有機會去做義工,將愛心帶畀周邊嘅朋友。」昂坪360義工特意扭出不同造型的氣球送給小朋友,汽球造型可愛,大受歡迎。而小公主舞蹈學校的女孩亦為眾人獻上舞蹈表演。

360有限公司公司事務總管劉淑儀表示:「希望受助人可以嚟到大嶼山,有一個好開心、啟迪心靈嘅旅程。好開心有機會接觸到嚟自基層嘅家庭及小朋友,同佢哋傾偈令我哋覺得要去關顧社區,令到佢哋釋放自己同人哋溝通,希望下一代青少年朋友與人有良好嘅面對面溝通及發展。」

經歷喪妻之痛的洪先生及子女亦能暫且拋開哀傷,他堅強地說:「好多謝蘋果基金之前呼籲大眾捐錢醫我老婆,我希望仔女身體健康,畀心機讀書,應承媽媽可以做個有用嘅人,回饋社會。雖然佢個病醫唔到,佢都冇遺憾,起碼善長人翁畀佢多一個月嘅時間對多啲家人,我應承老婆會好好照顧一對仔女。」

「蘋果日報慈善基金」衷心鳴謝「昂坪360有限公司」贊助是次壹義工隊活動,讓基金暖流之友能乘坐纜車往昂坪市集遊覽,體驗本土景點特色,增加親子相處的歡樂時光。在未來的日子,基金將召募壹義工,歡迎有興趣加入壹義工隊的讀者報名,詳情請致電基金熱線29908688查詢。

壹義工登記表格下載: http://bit.ly/1Tp6ROU
「樂.行善專戶」專戶編號:S0031
網上捐款: http://bit.ly/applecharity

網上捐款 捐款記錄
蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載