蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年08月26日
馬上成為壹會員

隔牆有耳:
立會管唔好 妄想做特首? 
曾鈺成 跑馬仔再中箭 - 李八方

立法會主席曾鈺成到底係咪參選?至今仲引起唔少人猜疑!雖然八方同大家一樣係唔知答案,但相信曾鈺成此舉已經驚動唔少人嘅神經,佢喺報章專欄直認參選言論引起反響,仲俾人質疑佢連立法會主席都未做好,竟然妄想去做特首?唔通又係新一輪特首抹黑戰?想嚇曾鈺成唔再出擊?

稱要深切反省

曾鈺成喺《am730》報章專欄話喎,有啲批評者指佢不自量力,點解?因為連立法會都冇管好,竟然妄想做特首?而話佢冇管好立法會嘅指控,仲要唔只針對佢嘅能力,仲關於佢嘅立場同操守,引述聽聞有官員話喎,兩年前嘅財委會主席冇管好財委會,係有心無力;佢冇管好立法會,則係有力無心喎,仲話有「高人」聲言,只要換咗主席,行政立法關係問題就會解決。
嘩,講到曾主席一戙都冇咁㗎?但明明佢在任主席時,泛民同政府中人都讚好㗎喎,至少係肯溝通嘅開明作風。噢,咁又係,呢種作風同「梁粉」非友即敵嘅作風格格不入,所以有人睇唔順眼放箭都唔出奇。大家都冇理由唔記得,曾鈺成自爆2012年盛傳要參選時,即刻「有人搞黑材料」,曾鈺成當時話相信黑材料來自梁營,而喺曾鈺成考慮選特首後,建制圈即刻有人插曾鈺成同泛民同聲同氣、點會獲中央信任呀?咦,唔知呢啲暗箭,喺邊度嚟㗎呢?話同選特首冇關,大家又信唔信呢?
而事實上呢,曾主席亦非省油的燈,點會唔反擊?但就一貫嬉笑怒罵,四両撥千斤。佢明言,有關「主席都做唔好」呢啲咁嘅指控,自己要深切反省之餘,都祝願佢哋判斷正確㗎,希望「新的立法會主席選出之後,就如他們所想,行政立法關係從此一帆風順」。八方都想睇吓下屆主席有幾咁厲害?

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載