蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年08月09日

「湯漢唔係講我」 
回應中梵談判 
陳日君:先放獄中神父教友

62,138

【本報訊】中梵建交爭議不休,天主教香港教區榮休主教陳日君樞機表示,自己和現任主教湯漢樞機對建交前期協議「一個悲觀、一個樂觀」,雖然意見不同,但相信湯早前發文指有人向教宗「詛咒與謾罵」,並非針對他,「唔好冤枉佢(湯漢)」;他認為繼續談判前,北京要表示誠意,「至少要放晒(內地)坐緊監嘅神父教友先有得談㗎,唔係有乜好談啫」。
記者:張嘉雯

相關新聞:感冒拒就醫 入院「執返條命」

湯漢早前發文談中梵建交,確認雙方即將簽訂協議。文中指國內及國際上不少關心中國教會的人士對中梵關係發展心生疑慮,有人甚至質疑教廷官員或教宗本違反教會的原則,「發出詛咒與謾罵」,強調教宗只會簽署促進中國教會與普世教會的合一共融的協議。陳日君昨日接受本報專訪時表示,擔心外界誤以為湯漢批評他,「大家誤會咗,佢(湯漢)唔係講我,唔好冤枉佢」。他指自己沒有將矛頭指向教宗,相信湯是回應內地的聲音,「內地網站就真係有人鬧教宗,如果唔係我都唔使寫個呼籲,叫佢哋唔好鬧」。對於與湯意見不同,陳認為「好正常」,「湯樞機樂觀啲,陳樞機悲觀啲,可能湯樞機知道多啲啦」。

指京建議主教人選不可行

陳對於建交後中國教會的情況感擔憂,認為要求一直忠於梵蒂岡的地下教會成員加入官方教會不是解決方法,「咁咪即係畀晒佢(內地政府)管?正式畀政府『辦教』?咁樣即係投降。建咗交又點呀?到時就算教宗去到中國,咪又係啲畀佢(內地政府)揀過,聽話嗰啲人先可以去見教宗,咁地下(教會)嗰啲點?」
中梵之間最大障礙一直是主教任命權,現時坊間討論的越南模式,指由當地政府建議主教人選,由教廷決定是否接受,陳認為在中國並不可行,「你話由越南主教同教廷揀咗,再畀政府否決,我贊成喎,因為越南愛國會唔成功,佢哋嘅主教真係我哋嘅人,佢哋係真嘅主教團,但中國主教團呢樣嘢根本唔存在,完全係政府管,點可以畀佢哋揀人呢」。

相關新聞:遭軟禁上海主教發「悔過書」

對內地教會情況痛心

陳直斥現時所謂中國主教團是「裂教」主教團。根據《天主教法典》,所謂裂教,即不願服從教宗或不願與隸屬教宗的教會成員共融,「教廷知道有啲人係被迫(加入主教團),先客氣唔叫佢做裂教」。他表示對內地教會的情況感痛心,「佢哋係唔尊重主教,完全係侮辱佢哋,扯住佢哋鼻子走」。
早前路透社調查報道指教宗方濟各或藉慈悲禧年,赦免8名自選自聖的非法主教,其中3人已被絕罰(逐出教會),教廷或讓8人繼續保留主教銜頭,但不再執掌教區職務,陳日君認為安排可以接受,但相信北京會拒絕。
湯漢數日前發表《中國教會與普世教會的共融合一》文章,形容教廷與北京的協議是「人間對話的典範」,堪比天主與人類對話,並暗示梵蒂岡可能會為中國度身訂做有中國特色的主教任命方式。本報翻閱最新一期《公教報》,全文刊登了湯漢的文章,但較早前陳的文章《從一個「沉痛的呼籲」講起》則不見蹤影。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載