› 選擇地區
三藩市
紐約
洛杉磯
其他美國地區
香港 台灣 北美
 
2016年07月28日

隔牆有耳:話要清算「選舉特務處」
國師 韓連山look 選立會 - 李八方

好多網民之前估緊熱普城嘅「國師」陳雲同「皇上」黃洋達幾時報名選立法會?兩人終於喺噚日回應萬千網民期望,尤其國師冇令網民失望,一時叫「大鵬金翅鳥大顯威力」,一時又話日後要清算「選舉特務處」,要開紐倫堡法庭,又話送晒佢哋去北韓;皇上亦不負眾望,繼續上演搬龍門絕技,仲大唱港版Pokémon主題曲造勢,聲言如果落選,一定係選舉舞弊,到底係乜邏輯呢?

指簽確認書顯示受迫害

國師噚日嘅一身戴帽打扮,令好多網民耳目一新,但都好想知道佢點解要扮韓連山嘅叔父look?又有網民話似梅啟明。國師出得山,神神佛佛點少得?點都要叫佢隻私伙小精靈大鵬金翅鳥出嚟,所以參選都叫番兩句「大鵬金翅鳥大顯威力」。
國師一邊話自己擁護《基本法》,但又同時話簽確認書係要顯示受政治迫害,警告「選舉特務處」小心做人,仲不忘用普通話講「政治清算不會饒過你們」。之後國師開始嚟料,預告當中共倒台、香港獨立就會清算呢班人,要開紐倫堡法庭審佢哋,送晒佢哋去北韓、西伯利亞受刑,但八方之後已經唔知國師講乜,因為好難理解當中邏輯!
皇上報名同樣充滿娛樂性。早排佢搞反Pokémon譯為「精靈寶可夢」遊行,上到國際傳媒,噚日報名可能見Pokémon呢排有勢,即刻唱首改編港版主題曲嘅《I love basic law》打打氣,以示自己有誠意「擁護」《基本法》!
皇上仲好有霸氣話,佢係全港動員能力最高、成員最多、行動力最強大嘅組織首領,《熱血時報》喺新媒體入面舉足輕重,所以佢咁勁,今次一定選到,選唔到就一定係選舉舞弊!有網民話皇上口吻似足叫熱狗一定要課金,唔課金就一定係左膠契弟一樣!

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載