› 選擇地區
三藩市
紐約
洛杉磯
其他美國地區
香港 台灣 北美
 
2016年07月27日

隔牆有耳:興奮試玩VR遊戲 
齊昕被綁架 叫爸爸 - 李八方

潮流興玩VR(virtual reality,虛擬實境),八方同動漫服飾設計師Lilian都唔執輸,噚日請咗周庭、楊岳橋同埋鍾樹根嚟堆填區試玩未有得賣嘅VR裝置同香港未曝光嘅恐怖遊戲《Kitchen》,全程直播。最令廣大讀者甚至八方都估唔到嘅,梗係「香港第一女兒」梁齊昕答應同《蘋果》一齊瘋狂打機啦!
話說八方上周忽發奇想,託朋友問齊昕有冇興趣試玩VR,勢估唔到佢好爽快一口答應,可惜噚日唔得閒,惟有早兩日率先試玩。第一次試VR嘅佢一戴眼罩就嘩嘩聲,話比想像中更加真實,仲興奮到將360度講成「365度」。
齊昕玩咗兩隻game,《Until Dawn》要坐礦車穿過血腥屠房同時射退喪屍,佢一啲都唔驚,仲嫌過山車唔夠激。第二隻係有女鬼襲擊嘅《Kitchen》,齊昕全程極度冷靜,見到遊戲角色俾人綁架,仲反問「係咪要對住佢講:爸爸(梁振英),你要攞幾多錢過嚟(贖我)?」

Tree根睇初音:係小鳳姐就正

比起齊昕嘅大膽,噚日試玩嘅嘉賓就有啲失威。周庭玩《Kitchen》時多次尖叫,仲要雙手掩頭,俾女鬼嚇到心驚驚;到岳少玩嗰陣仲誇張,驚到失控叫「oh shit!」
Tree根玩《Until Dawn》嗰時一粒聲唔出有啲緊張,去到射喪屍仲卡關;岳少就玩到呱呱叫,佢話最好玩係坐過山車會有離心力。
去到身處演唱會現場嘅《初音》,熟悉日本流行文化嘅周庭聽住歌曲哼好開心。Tree根亦投入到彈起身,係咁揮支控制器螢光棒,話台上「如果係真人,好似小鳳姐就正」。
想試PS VR嘅周五起可以喺動漫電玩節SONY攤位試玩,據了解現場仲有1,000個walk-in名額。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載