蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年07月07日

隔牆有耳:特首戰開鑼
CY 9月使走奶媽 - 李八方

特首梁振英早前話9月決定係咪爭取連任,而查實答案大家心中有數。或者因為咁啦,CY連一年一度嘅重要外訪都缺席,話說貿發局2011年起每年搞嘅「邁向亞洲 首選香港」大型海外推廣活動,今年9月底到訪德國,但唔再由CY帶隊,而係由林鄭月娥代勞。莫非CY想宣佈參選特首嗰段期間,掟走對佢好有威脅嘅林鄭,以免影響選情?
依照慣例,呢個9月底舉行嘅外訪應該由CY帶領一班財金代表同官員出席,但貿發局新聞稿話揭幕禮居然由政務司司長林鄭月娥主持,CY會缺席。

首缺席貿發局外訪

政府以往對呢個活動有幾重視?過去5年其實都係由特首領軍,前特首曾蔭權去過兩次,到訪英國同日本;至於CY亦都連續3年出席,所以今年係特首首次缺席。而外訪其中一個重頭戲,係探討香港同德國一帶一路機遇。CY咁都唔畀面?好明顯另有大事。除咗佢之前話9月後考慮係咪競逐連任,八方諗唔到其他原因。
八方問過特首辦,點解CY連咁重要嘅活動都缺席?去sell佢最鍾意嘅一帶一路喎,發言人只係回覆:「行政長官會按其日程及公務安排決定是否出席各項活動。」

林鄭會泛民 狂晒醫療CV

至於喺呢個重要時刻被「流放」到德國嘅林鄭月娥,佢嘅特首選情又會唔會因此受影響?八方相信對林鄭而言,完全no problem,否則點會有好打得稱號?而呢排狀態大勇嘅林鄭,近日仲喺醫生註冊條例親自領軍,爭取泛民支持。有與會泛民透露,唔知林鄭係咪太過心紅?其間自誇多於游說,會上狂晒CV,話自己以往多個政府工作崗位都係同醫療有關、好熟醫療系統運作、識得好多醫生,「畀人感覺係佢最叻,你哋(議員)統統未夠班。」
據知林鄭一坐低就話自己公務生涯,三分之一同醫療有關,連當年做庫務局副局長時代表政府坐喺醫管局都計埋。有泛民話會面係想收窄分歧,為條例草案尋求出路,唔係想聽佢有幾叻同幾醒,有泛民覺得佢好傲慢,「我哋平日見其他官員,人哋都好少咁樣(晒CV)。」

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載