› 選擇地區
三藩市
紐約
洛杉磯
其他美國地區
香港 台灣 北美
 
2016年07月06日

劉德華都要企開!
粗口麻雀冇得打「發財」

(翠如BB慎入)要學識一種語言,首先一定係學識點樣講粗口,尤其是係廣東話嘅粗口。以「門」為部首嘅廣東話粗口,組合同應用稱得上係千變萬化,而且講粗口要睇場合,打麻雀就啱X曬。有個設計專頁就利用呢個特質,整咗副以粗口為主題嘅「嗱喳麻雀」。

根據fb專頁Studio Sorry嘅短片所講,呢副咁別出心裁嘅麻雀一共有105隻,其中64隻係顏色粗口字牌,好似「尸口巾」、「門西」(費清拆開曬啲字,但你都應該睇得明)同「老母」等(唔好問點解「老母」係粗口),35隻白色普通字牌,仲有2隻百搭牌。

玩法同一般麻雀類似,一開始都係翻轉晒啲牌嚟洗,每人攞13隻。每次出牌都要「言之成理」,運用你粗口知識砌成一句順口合理嘅組口。第一次出牌一定要出5隻,亦可以用台面現成嘅牌拆出嚟砌成新一句,出唔到就要摸牌,最快出晒手頭上所有牌就完場,每完一舖之後就按剩低嘅牌去計分,最低分就係贏家。

專頁條片仲寫住「#?爆粗打冷震」(唔明嘅返去惡補潮文)同埋「#撐粵語」,後得到網民力撐,而家已經有接近萬五個Share。

費清本來想問吓設計者會唔會真係有得買返副嚟玩,不過暫時就未收到回覆。

有啲大人逼學生喺學校用「普教中」,但究竟用廣東話定普通話學中文好?費清唔直接答你,只係想果啲大人問吓自己,鬧人嗰時係用廣東話粗口定普通話先啦。

https://www.facebook.com/studiosorry/

費清#要生計,也要生活#毋忘初衷

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載