› 選擇地區
三藩市
紐約
洛杉磯
其他美國地區
香港 台灣 北美
 
2016年07月04日

隔牆有耳:
點解次次激進事件冇被拉? 
「霸氣」皇上:梗係走啦 - 李八方

熱血公民「皇上」黃洋達嚟緊預料再戰立法會九龍東,上屆差少少就入局,今屆再戰,唔知有乜勇武行動作招徠,但佢嘅抗爭模式同手法,肯定成焦點。佢出席有線電視嘅《政壇單打》節目時,就同喺九東競逐連任嘅民主黨胡志偉就此激辯,仲一度被質到欲語無言咁!

胡志偉轟冇抗爭道德

節目開始無耐,主持人就大爆皇上拒絕同打算選九東嘅快必譚得志同台較量,皇上解釋同佢「冇乜討論價值」,仲強調話係睇唔起佢喎。
去到埋牙階段,被主持人問到點解成日啲激進事件都拉唔到佢,皇上好有氣勢咁反駁:「梗係走啦,大佬,做乜俾佢拉呀?」佢解釋,每個人能夠承擔嘅後果唔同喎,而佢嘅責任呢,就係要帶領抗爭者「逃離現場」,被胡志偉批評作為政治領袖,唔肯承擔。
皇上就回應話:「我要承擔嘅責任,係安排佢哋(抗爭者)安然離場。」又話領袖要「教育到群眾、保護到群眾」,唔可以坐喺度俾人拉。
胡志偉聽到呢度火都嚟,連珠炮發斥對方:「你作為一個領袖,係企喺後面……你教育群眾嘅意思,係你去掟、我教你去掟,你煽動佢哋去被拉,如果咁樣,你作為一個政治領袖,連最基本嘅人格都冇。」皇上一度反駁話胡志偉完全扭曲,但胡志偉繼續鬧佢帶領群眾去犯法或者會增加政府管治成本,但皇上卻只係慫恿人哋,「自己就匿埋,話畀人聽我就唔拉得」,憤憤不平鬧爆佢冇最基本嘅政治抗爭道德。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載