› 選擇地區
三藩市
紐約
洛杉磯
其他美國地區
香港 台灣 北美
 
2016年07月04日

舊作再版講共產黨追捕經歷 
「港青抗爭唔逃避」 
倪匡︰佩服佢哋

【本報訊】漸趨低調的名作家倪匡今年趁書展出書,將已絕版舊作再編輯重見天日。深居簡出但仍關心時事,倪匡不認同外界批評香港青年激進,並稱自己當年逃避共產黨來港,「𠵱家啲後生仔唔選擇逃避,選擇對抗,我好佩服佢哋。」常批評中共的他又笑言不再反共,因強國已無共產黨,「𠵱家全部都變晒資本家,你搵個共產黨(員)畀我睇吓。」
記者:佘錦洪

相關新聞:「絕筆」序言 笑稱江湖賣藝

倪匡80年代作品《倪匡傳奇》講述他青年時逃難來港經歷,《靈界》則公開其命書及對鬼神學說的見解。今次由豐林文化再版,促成此事的倪匡契女陳麗珠稱自己丈夫兼新書主編施仁毅是契爺書迷,幾經辛苦在網上找得這兩本絕版舊書,以《倪匡談往事》及《倪匡談命運》之名重新出版,並加入全新訪談內容,令讀者更立體了解這位一代名作家。
倪匡少年時曾是解放軍及公安成員,親睹共產黨腐敗,最後遭特權階級誣衊被迫逃亡香港,成為文壇反中共標誌。

「我站喺年輕人嗰面」

今日大國崛起,再談共產黨,他受訪時竟稱不再反共,「我話我唔反共啦,點解啊?𠵱家冇共產黨,邊度有共產黨?嗰啲共產黨個個都身家千萬億萬,仔女喺晒英國,自己周身名牌,出嚟個個都乜乜集團總經理,全部都變晒資本家啦」。
倪匡也指出內地電視劇一個怪現像,「全部集中講做生意同感情,大企業見到女總裁攬住幾十萬皮包,企業黨委書記去咗邊?」他稱習近平要求媒體要姓黨,但電視劇偏偏反其道而行,「共產黨員咁光明正大,點解要故意避免?尤其是香港共產黨身份唔公開,好似梁振英個個都知係共產黨員啦」。
857 2771,兩組共7個阿拉伯數字,是公共圖書館中衛斯理科幻小說的索書號,佔據整個書架,是不少青年人的啟蒙讀物。對於本地青年被形容為激進,倪匡認為年輕人站出來反抗必有自己一套想法,「以我過去立場嚟講,總之我一定站喺年輕人嗰面。」
倪匡指自己雖然是「老坑」,但不會固守所謂老人立場,認為時代環境以至科學進步,都會影響青年人產生新的思想,「人類之所以有進步,全因為下一代人唔聽上一代話」。他指青年人創意令人眼花繚亂,每隔20至30年就一代,不可沿用舊有制度。
他的80年代作品《追龍》似已預告香港的死亡,倪匡指自己40年前已明言回歸後「香港死梗」,就如同魚在砧板上,「有冇得救?冇得救,但佢都要跳幾跳,而家香港後生仔就係想跳幾跳。」年輕人講抗爭、講港獨,他坦言未夠激進,「我係最冇勇氣嘅人,冇勇氣反抗咪逃走算數,𠵱家啲後生仔唔選擇逃避,選擇對抗,我好佩服佢哋。」

相關新聞:「食肉要食肥 食雞要食皮」

指中共思想教育失敗

一片反赤化聲音中,不少人主張守護廣東話及正體字。倪匡稱內地早已開始消滅本土語言,「上海講上海話嘅細路越來越少,上海話20至30年後就冇㗎喇」,但慶幸廣東話尚有香港可以維持。他又指自己向來討厭殘體字,最主要壞處是「唔好睇」,但與內地人談及時對方從不覺得是問題,「好似個個都光頭冇頭髮,咪覺得冇問題」。
倪匡稱共產黨收回香港多年,最失敗是未做好思想教育令社會到處反共,「當初搞革命宣傳共產主義,搞到全國青年人如癡如醉、如瘋如狂嘅本事去咗邊度?」他認為共產黨「連收番香港之後出世嘅後生仔都搞唔掂」,笑稱「你思想教育實在太失敗。」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載