› 選擇地區
三藩市
紐約
洛杉磯
其他美國地區
香港 台灣 北美
 
2016年06月27日

隔牆有耳:
曾主席滑蛋炒蝦爆like - 李八方

曾鈺成同拍檔合作整嘅滑蛋炒蝦,係唯一一碟被掃清(下圖)。

為鼓勵健全同智障人士建立一對一嘅友誼,扶康會每年都會舉辦「香港最佳老友」烹飪比賽,其中一個環節係由立法會議員拍住智障人士一齊煮餸,參加咗好多次嘅立法會主席曾鈺成今年終於憑滑蛋炒蝦首度奪冠,新鮮出爐「地獄廚神」則由將牛肉煮到甜嘅街工梁耀忠奪得。

梁耀忠成地獄廚神

烹飪比賽喺荃灣一個商場舉行,參與議員包括曾鈺成、劉慧卿、梁耀忠等。曾奪「最合拍大獎」嘅曾鈺成今年同「最佳老友」周善落廚,戴起廚師高帽同口罩嘅佢有板有眼。
比賽一完,3位名廚師傅同議員齊齊試食,只有佢碟滑蛋炒蝦被掃清光,其餘議員嘅「佳餚」食剩好多。
曾鈺成話阿媽以前教過,「啲蝦一熟,就要落蛋,一落蛋要即刻炒,炒到一乾就要即時起碟,唔好畀佢煮到乾,唔係啲蛋就會老」。相信同樣係最後一年落場嘅卿姐今年飲恨,僅以一分失落「最佳合拍獎」,輸咗畀社署署長葉文娟嗰隊。
八方問過周中師傅,佢話曾鈺成煮啲蛋真係好滑。問到邊個係今屆嘅地獄廚神?佢話其實個個都差唔多(咁差),但被點名嘅就係梁耀忠,因為佢碟牛肉竟然係甜。難怪,阿忠話自己平時都唔落廚嘅。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載